MAHABHARATA
IL I BHISHMASKI
Shoru XIII
U Vayshampayanas vakeryas:
1. Ozaman korkorru oda kana ahwylu sourru anglisarnu,
sourru akana te ovila ti sourru sotu mw ovil anglunis, of Bharata
U buddhikanu Gavalganis, astardu dukhatar, inkistu andar i maribnasti
2. Ti yakapancha kana dishwyas pis i Dhritarashtraski, sastu andw pisti,
mothwyas liski, ta u Bhishmas, u papus Bharatingu, si mudardu.
U Sanjayas vakeryas:
3. Me Sanjaya sim, of, maharaja! Chokat zhi phuveti tuki, tur-Bharata!
Mudardu si chshov Shantanusku, u Bhishmas, u papus i papungi Bharatingw!
4. Shoru i sourrw kshatriingi, sourrw manushwngi tira te chshena, bishapi,
Akana inkistu opra than tiranindar, pashlu otka si u papus Kauravingi!
5. Chshov torru keryas khelwybi porru ashitsintsa kana dwyandw
i liski enbari raksha,
Ama akutu pashlu si Bhishmas, perkerdu Shikhandinistar, mudardu andw
maribnasti, of, raja,
6. Kuka, kontu si thagar i sourrw thagarwngi, te marna pis
andu kwka maha maribnasti,
Tela i ziswsti Kashi vijwyas manush ekh opra ordonisti, kwka, te tradila ordon,
7. Kontu u Rama, chshov Jamadagnisku, te na tsiilas kana vijwyas
kana marlas pis ekh-ekhisti lisa,
U Jamadagnis na shi mudaryas, ama u Shikhandinis mudaryas avzis!
8. Sar heroi oda sar u Mahendras si, zoralimnasti prepilas i Himavatuski,
Sar Baru Deryav, oda si andral shantikanu, zoralu sar mursh te inkerla Phuv;
9. Lis, te na shi asharws, tira liskw – sar danda, harru lisku – sar phirradu muy,
talvari lisku (prepila) chshibati,
Ti (kwka) aslwy-manush, papus torru, akana mudardu si panchalindar!
10. I but bari armiya Pandavingi, kaskanwyru liski,
kontu urwyas opra Kurukshetrati,
Lyas ti izdral trashwymnastar, sartu (izdrala) guruvingi charada
kaskanwyru i aslwysti.
11. Kuka i barw kshandriingi mudarnu loyzilas i armiya twrri desh zeswratsya,
Ti kana keryas kwka en bari dukhwymnangi butsi gelu piski – sar Kham.
12. Kuka te chshelas siyada tira, chshorilas lin sartu dela brishind, sartu Shakre,
Kontu andw deshw zeswndi mudaryas her zes desh lindar siyada saldatsin,
13. An kwka akana pashlu si i phuveti sar perkerdu kash, of, Bharata,
Soskutu dyan lis tu doshwy gozi, raja, dinuli kan oda twrrw pheryaswndi!
Kide andi somnwy “Mahabharata”,
andu “Il i Bhishmaski” andu “Il Bhagavadgita”
mothwyas amingi deshutriningu shoru, anovimi
MOTHAZIPI I BHISHMASKU MERIMNASTI
Shoru XIV
1. Sar u Shikhandinis mudaryas mandakus Kauravingu Bhishmas?
Sar u dad morru, lachshu sar Vasave manush, pelu i ordonistar?
2. Vaker mangi, Sanjaya, sar mulu u Bhishmas,
Pwrrw kuvetsisa te syas sar Devel, kontu arakhilas astsyal u dadisti porru
ti loyzilas dinu porru pheryas ti ovil brahmacharya?
3. Kana syas perkerdu u enkuvetsingu, but te zhannas, u mahaharruningu,
mahaozingu, sher-manush, so olu i iluntsa amarw kshatriingi?
4. Kanatu tu vakeryan mangi, ta kuka bar-manush, mandakus Kauravingu,
mandakus-manush si mudardu, enbari dukh thaswyas mu ozi.
5. Ekh syas anglal, aver syas palal, kanatu oda lyas naangli pw armiyasa.
Kon loyzilas lisku dumu, kon syas turyal listi, Sanjaya?
6. Sher (kshatriyas) enlachshu trazimnangu ordonis,
kon i barvali kshatriindar syasas lisa?
Kon phirlas pala lindi, kanatu oda pwrrw manushwntsa daldu syas mashkara dushmwyndi (horr)?
7. Oda, kana ipallas lin, sar kham te ipalla skutsimakus, dushmwyngu
mudarimnangu i dushmwyski armiyatar,
Siyadakiranisku, te na shi asharws, te trashazilas dushmwyskw saldatsin,
8. I maribnasti chshavintsa Pandaviskw keryas oda kuka, ekh te na shi kerwl: Nashalzikeryas sastsi dushmwyski armiya!
9. Tu syanas turya listi, Sanjaya, kanatu oda keryas an kwka,
Sar u Pandavya asharnas pis i Shantaniskw chshavisa?
10. (Liski), zhanimnasa ozizilali dushmwyski armiya,
(dandiyasli) tirin sar danda,
Dhanush [harru] koningu sinu sar trashnu, phirradu muy,
pali u talvari – tezi sar karr?
11. Sher-manush, te na ovilas (ti mwrwl), dharmaku,
kontu nikonistar nanwy vijwymi zhi akana,
kanatu i Kuntiskw chshavi perkerdi, u navijwymnangu maribnindi,
12. U trashnu dhanutazhis [harruzhis] te chshela tira katar u shukar ratha,
shwrw dushmwyngw hwvkerlasli kwlisa?
13. But bari Pandavingi armiya bi ti zaprizil izdralas,
dikhyali sar vazyali pis oda ti marwl pis,
sartu pharws inkerla pis i yag i devaki Kali:
14. Sasti desh zeswratsya oda chshorkerlas dushmwyskw saldatsin,
(kwka) mudarnu manushwngu!
Ti akutu, kanatu bitti pi butsi, gelu piski sar kuda Kham!
15. Chshelas oda tirin sar brishind, mw sanwyrunus, ta asharlas pis i Shakrisa kon agu mw ovil mashkara lindi,
Ti shwl siyada siedis (kshatriin) mudaryas i deshw zeswndi maribnasti.
16. Perkerdu, on pashlu phuveti si, sar enbaru kash, perkerdu tufwyndar;
Soskutu dyas kan i mwrrw doshali gozin ti khwi baht pei opra listi
u kwka Bharatas!
17. Sar syas shiyzimis ti zaprizis i charada saldatsin Pandavingw,
Dikhyali trashnuni, ensahatsingu chshavis Shantanisku, Bhishmas?
18. Dwy syas shiyzimis ti zaprizis u maribi Bhishmasa, Sanjaya?
Dwy syas shiyzimi u Bhishmas ti na mangil ti vijanil
u Dronas kana syas zhivdu,
19. Kanatu (u ternu) unukas Bharadvajisku ti Kripas syanas turya listi,
Sar syas shiyzimi meribi ti rwswl u en lachshu mashkara kshatriindar
Bhishmas?
20. Sar syas shiyzimi Shikhandinis, kuka rajkumari panchalindar,
mudardu andu maribnasti ekhisa
Te na shi vijwynas Devela da u maharathasku Bhishmas?
21. (Lis), kontu pis sanwyrulas ta si dyuzi i mahakuvetsingisa (Ramas)
Korkorru Jamadagniskw chshavis na shi asharwl kuda,
pw bitrashwymnasa te si dyuzi i Shakrisa!
22. Sar si mudardu kuka Bhishmas andu maribi ekh-ekhisa,
te si bendu katar u manipi [jana /zhwni/] maharathingu?
Sanjaya, vaker sourru kwka i murshwsti, soskutu na shi teryava ekhi thanisti.
23. Kon i mwrrw mahatiringw manusha (lis), eternis (enshundu) na olwyas?
Na dyas u Duryodhanas adeshi turya listi ti loyzin lis shundi kshatriin?
24. Sar syas shiyzimi u sourrw Pandavya, Shikhandinisa
en anglal, ti avin but pashw Bhishmasti?
Nanwy sourrw Kauravin oladili syas u eternu (kshariyas), Sanjaya?!
25. Ya ilu morru shudrilu, (rwstu zhi otka) ti ovil barr,
Ti sa dyavas man gozi kana ahwimas so ovila i manushwsa-sher,
u Bhishmas, ti na zaprizil mu ilurru i paseymnastar?
26. Pachiv lisku baru si, zhivzimnangu kuvetsi da, buddhikanipi da;
Naasharimnangu kwka mandakus-Bharata, sar olu kide, ta syas mudardu?
27. Sesi khichnaki pratyancha i lisku dhanushwsti
chshorikeryas ziswsku vayu sar dwnnwypi bulutsistar,
Maha dwnnwypi pratyanchaki lisku dhanushwsti –
en baru, opral dwnnwypnastar bulutsistar.
28. Chshyas oda brishinda-tira karig (zis) Kuntiskw chshavisti,
panchaluya, srinjaluya,
Kana mudarlas dushmwyskw kshatriin i lingw rathingi, pw vajrasa – danavin,
29. Naasharimnangu, sartu mudarimnangu Banas.
Syas enbaru deryav tiranindar ti swy nanwy bundukiin,
Dvip na dikhilas pis, na shi nakhisas, (uchshardu) shaktishalimnangu,
phirimnangu talazisa:
30. Musala, talvarya – (liskw) bohuya, arjanipilakw (grasta),
hatha-jalavarthakw,
phirimnangw saldatsin – charada machshw, (sesi) buriin ti dauin –
uttar roibi deryavisku.
31. Kuka prastanu karig dushmwyn kshatriyas mudarla ekhi chalwymnasa
but grastin, hathin, rathin ti phirrimnangw saldatsin;
32. (Lin) kerla chsharwsti (pwrri) hoimnasa dushmwya dukhwykerla,
Liski hoy si trashnu – sar bohus te zhivindila andw horr pwin
zhala mamuy lindi ti perkerla talazya kshatriin.
33. Kanatu mudarnu dushmwyngu Bhishmas ratisti marlas pis, Sanjaya,
Astsyal anov Duryodhanisti, kon anglal listi syas?
34. Kon loyzyas dayaku pahiya [kololus] i enserbeziski Bhishmas?
Kon, zoralu andw dini pranin, marlas pis i dushmwyskw kshatriin
karig i rig dumya lingw?
35. Kon i anglalni manushwndar te loyzinas Bhishmas,
syas (pash) listi ti inkeri denas (chalwybindi)?
Kon karig i rig dumisti loyzilas pahiya (rathakw) kshatriisti
te marlas pis kshatriintsa?
36. Kon syas pash i baya rigatar, kanatu kuka mudarlas srinjain, Sanjaya?
Kon garwylas zoralisasharimnangu andu anglalnu khizimakus senatar?
37. Kon loyzyas lis katar i rig dumisti, kana lyas u merimnasku drom oda?
Andu maribnasti kon i dushmwyskw kshatriindar mamuy listi syas, Sanjaya?
38. Sar i liskw manushwndar loydi lis, kon agu syas mashkara lindi?
Soski na vijwydi sigu senin Pandavingw, kibortu kwka te syasas nanwy lokis?
39. Soski (prepindu) gomisarnisti i sourrw themingi,
gomisarnu i sourrw zhivdi manushwngi ti hwyvwyngi –
Parameshthinu shiyzimi syas ti khoswn pis u Pandavya, Sanjaya?
40. Kuliski, telal lisku beshwymnasti, sartu oila andu durg,
mardi pis dushmwyntsa Kauravya,
Bhishmaski, u sher-manush, vakersa tu, ta si mudardu oda, Sanjaya?
41. Andu bitrashwymnasti kwkwli i shaktishalisku manush
mu chshov rodilas loyzipi
Kudwliski Pandavintsa da na delas pis gozi,
pali (tu antwysa) nevipi, ta si mudardu dushmwyndar, Sanjaya?
42. Na [i]syas vakwtsi kanatu listar, matserdu maribnastar,
rodinas madad u buddhikani (devela),
Kanatu danavintsa odwna marnas pis! Of, kuchw morru dadurrwya!
43. Kanatu kwka maha manush bendzyas pis, Shantanu,
enshundu andw dunnyasti,
(I baht dyas liski) enshukar chshavis, chshyas oda dukh, dukhwypya ti swkletsi.
44. I enshundisku manush, te zhanna Enuchw dromis,
kontu arakhila i dharma pwrri, shuzhw manushws,
I chachukanu punjardisku Vedingi ti lingw kotora,
swy ekhintsa vakersa mangi, ta mudardi kwka manush?
45. (Mudardu) si manush, te punjarlas swy nanwy bundukiin,
shantimi, astardu andw pisti, buddhikanu?
Kana shundzim, ta si mudardu chshov Shantanisku, dim man gozi,
ta si nanwyskerzi amari agorwski asha!
46. Kide sanwyrum: chachuypi asharla bandzipi, ama akana an kuka asharyas,
Pandavya panda mangina u thagaripi, palal mudaribi pakivali gurusti da!
47. Ekh vakwtsi Ramas, chshov Jamadagnisku, te inkerlas maha bundukiin, naasharimnangu,
Ashardu syas u Bishmas ekh-ekhisa maribnasti andu maribi kurdu Ambatar.
48. I enuchwsku i sourrw harrundar,
kukwliski, kontu i sourrw pwrrw kerzimnantsa prepindu pis Indraski,
Astsyal meribi Bhishmasti tu mangi antwysa nevipi, kontu si kide kerkikanu?
49. Lis na shi nashwykeryas kuka da, kontu mudarlas sasti senin kshatriin,
Kuka kshatriyas, Jamadagniskw chshavis, dushmwyskw kshatriin te mudarla!
50. Na syas mudardu (ozaman) u butigozeverwsku,
mudardu syas akana Shikhandinistar.
Gelu piski kwka mahamanush jinsistar Bhrigu, te matserlas pis maribnastar,
51. Enlachshw adetsisa, murshikanipisa, kuvetsisa ashardu Shikhandinistar, chshov bendu Drupadatar,
Kuka, kontu u manush, te punjarlas swy nanwy bundukiin,
u kshatriyas, shundu andw maribindi,
52. Pelu kwka, te punjarlas en lachshws u bundukiin,
u mahamurshwsku mandakus-Bharata!
Kon i barwmurshwndar syasas turya kukwli saldatsis, te mudarlas dushmwyn kana lyasas lin mamuy?
53. Vaker mangi sar phaseylu maribi mashkara Bhishmas ti Pandavya?
Palal liskw merimnasti phivzi oi mw chshaviski sena, Sanjaya;
54. Sartu charada gurvi bi kuka, te phirla angla lati dukhala i sena mwrri.
Palal i merimnasti andw mahamaribisti kwkwliski,
kontu pw murshikanipisa syas opral sourrwdar i themisti?
55. Kon patsyalas liski, so olutar ozaman tumarw iluntsa?
Ti akana sar mw ahwykeras amaru zhivotus, Sanjaya,
56. Sar kide olu, ta mulu mahakshatriyas, u dad,
u enbaru andw chachukani dromisti?!
Sar dikhila uzharzimnangu manush aver jahazi, kana lela dibi andw horr pweti,
57. Kide chshavi (mwrrw) andw dukha pharws dukhana i mudardi Bhishmasti!
Ya pali mu ilu barr olu, Sanjaya?
58. Dwy na patladw kana ahwylu, ta si mudardu u Bhishmas,
kwka sher-manush!
Kuvetsi lisku sar saldatsi, kuvetsi lisku duhkhusku ti zhivzimnangu buddhi
i kwli mandakus-manush
59. Na syas shiyzimi ti ahwys kibor syasas, na syas shiyzimi ti asharws lis!
Kide da na ahwimtar sar mudardu syas?
(Arjanimnangu si), ta ne bundukiya, ne murshikanipi, ne buddhikanipi,
ne u drom phirrimnangu i zhivzimnangu kuvetsi,
60. Ne zoralipi da, ne pali kana chshesa sourrws turya tuti si shiyzimi ti loyzin tut i merimnastar.
Ti zhanis i Kala – i en uchu kuvetsi,
kontu si nanwyasharzimnu nikonistar andw dunnyasti,
61. Dwy i merimnasti i chshov Shantanisku, u Bhishmas, tu zieskersa,
of, Sanjaya!
Thardu dukhatar i chshaviski, me dizimi sim gozeti astsyal mahadukhaki,
62. Loyzimnasti uchu i Bhishmasti, chshov Shantanisku, asha isyas man!
Kanatu u Duryudhanas dikhyas u Shantanisku chshov,
te syas sar Kham, perkerdu phuveti,
63. Ozaman kastar ti rodil loyzipi mu chshov, of, Sanjaya?
Kana dyavas man gozi i mwrrw manushwngi ya i dushmwyngi,
na patsyava, ta khek veki mw alakhil pis ti kerwl kwlis, Sanjaya,
64. Na dikhava swytu ti ovil shiyzipi ti loyzil pis u loyzimnangu phuveti,
trashna si i dharma kshatriyasti, kontu i rishin arjaniskerna amingi,
65. Kana mudarna chshov Shantanisku, thagaripi mw achshwl Pandavingi.
Amin da kana na shiyzyam ti loyzas lis, kwlisa amin da mangasa thagaripi!
66. Ti zhanil pis, achshipi andi dharma i kshatriingu,
mwrrw chshavingi ti Prithiskw chshavingi, bezah ne lingi, ne averwngi!
Kide mangseyla pis ti kerwn u ariin kana kikidila lin u zhivotus, Sanjaya:
67. Barwozisa ti agorwkuvetsisa odwna mangseyla pis ti len u khwypi
mamuy pisti.
Manush rwsisa andw pisti, te na shi asharws lis,
kontu mangilas ti nashwykerwl (dushmwyskw saldatsin),
68. Chshov Shantanisku, sar dushmwya syas shiyzimi ti perkerwn u Pandavya?
Kati syas beshwykerdi senin? (Kwkwli) mahatma manushwntsa sar maryas pis u Bhishmas?
69. Sar u dad morru, u Bhishmas, mudardi dushmwya, vaker tu, Sanjaya!
Sotu vakerdi Duryodhanis, Karnas, Shakunis, Subalakw chshavis,
70. Kwka da (khelwymnangu-mentarazhis) u Duhshasanis,
kana syas perkerdu u Bhishmas?
I kshetrati, uchshardu maswntsa kshatriindi, grastindi ti hathindi,
71. Bhalintsa, tirintsa, en barw talvarintsa, bhalintsa te chshena pis, chshurintsa, trashna kulharintsa,
Andw kwna maribindi bigozingw, biparvarzimnangw,
72. Andi chsharwsti i khelwypi zhivotusti ekh vijwyas,
pali kontu nashwyas i kwlindar mandakuya-manusha?
Kon vijwyas otka, kon avryal kwlis te mothasa lis syas perkerdu?
73. Averwngi, bi Bhishmasa, chshov Shantanisku, lingi rromizi mangi Sanjaya!
Mangi nanwy shanti kwli zeswstar, kanatu ahwim ta u shuzhu si mudardu,
74. Dad, te trashazilas kerzipnintsa pwrrw, u Bhishmas, u lachshipi marimnasti!
Dukh astaryas ilu morru, barila odiya kana dyava mangi gozi,
ta chshavi mwrrw mw ovin perkerdi,
75. Tati tsilisa parvarsa tu morru thardu alwybi, Sanjaya!
Of, chachuypi si, ta dukhana mw chshavi, kana dikhli perkerzipi Bhishmasku,
76. Shundzikerdu i sourrw themindi,
thoyali pw pikindi u baru pharipi praningu!
Shundzimtar me swy nanwy khwypya, te kerzyas Duryodhanis!
77. Ti kide, rromizi i sourrwski, Sanjaya, sotu otka phaseylu
Ti kuliski sotu olu i maribnasti!
78. Sar oda ozizilas maribi – lachshws ya khwynis, – vaker tu, Sanjaya,
Ti so shiyzyas ti kerwl u Bhishmas, te mangilas u vijwypi?
79. Rromisker ekh pala avrwsti, pherdis, bigarazimnasa sotu ti ovil,
Sar nakhila maribi mashkara senindi Kauravingw ti Pandavingw,
80. Sar ti swy vakwtsisti otka so otka olutar.
Kide andi somnwy “Mahabharata”,
andu “Il i Bhishmaski” andu “Il Bhagavadgita”
mothwyas amingi deshushtarwngu shoru, anovimi
PUCHIBI DHRITARASHTRASKU
Irizyas S. Savchev
VACHANIS
Basavanna
8.
Dikh, u themi, kerilu
tufwystar deryav, sar chshela pis mamuy manushwsti.
Soski vadila pis karig mw ilisti da?
Of, vaker
soski zhi mw hulati avila?
Gomisarniya,
sar ti kera tuki pheryas,
kanatu uchsharla veki mu shoru?
Gomisarniya, gomisarniya,
shun u sesi morru.
Of, Gomisarniya i ekhiskerdi lenin,
shun man.
9.
Zes pala zeswsti opra pisti
thovavas ekh opra avrwsti
gunis arjanistar.
Hwyas man
dunnyas – u baru sap,
u Rahus – te hala sourru.
Mw masa
sini skutsimya avzis.
Ama oshtazipi kana mw ovil
of, Gomisarniya i lenindi te ekhiskerna pis?
21.
Dade, andw nazhanimnasti Tu trazyan man tusa ti nakha
andar perra dwekw,
andar swy nanwy themin.
Dwy syas bezah, ta me benseyavas,
of, Gomisarniya?
Dwyalu karig mandi ov,
nanwy ekh drom te benseimas.
Pheryas dyava tuki,
Gomisarniya i lenindi te ekhiskerna pis,
ti na bena man veki nikana.
36.
Eyya zhukela
prastadili [dehetti] pala shoshwysti,
u hanjwhoya maswskw
gyuryultiya kerna:
“De!
De!”
“De! De!” –
gyuryultiya vadina
u hanjwhoya andw gozeti.
Dwy mw rwswl Tut mu ilu,
Gomisarniya i lenindi te ekhiskerna pis,
anglal u indriya-zhukela
ti rwswn lis ti ti thasazin lis?
52.
Sartu gurvi, dalzili i batatsisti,
shoru bandzyava me da karig-kurig.
Nanwu kon ti rodil man,
ne ti alakhil man,
zhi kanatu u Gomisarnu morru na dikhil kwka hwyvwytsi
ti shingindar ti na inkalil lis.
59.
Mw changa phag, Dade,
ti na phira kwtka ti kutka.
Li mw yakha, Dade,
ti na dikha karig kwlis ti kulis.
Ker man kashuku, Dade,
ti na shuna nikachshi aver.
Mangava sade
twrrw papalni kwzwya
ti ovin mangi diretsi,
of, Gomisarniya i ekhiskerdi lenin.
62.
Ma tradi man sastu zes ti shuna:
“Kasku, kasku, kasku si kwka”?
Mangava ti shuna: „Morru, morru,
morru kwka si”.
Of, Gomisarniya i ekhiskerdi lenin,
tradi man ti indriyskera man chshov
kwli kherwsti”.
64.
Shiva, na Syan dwyalu.
Shiva, nanwy Tut ilu.
Soski keryan kide, ta ti bena man
bibahtalu i kwkwli themisti,
ipaldu averwstar?
Vaker mangi, Gomisarniya,
dwy nanwy tut panda ekh
tsikurru vidwy ya luluzi
bendzikerdi sade astsyal mangi?
132.
Mw tradis lin pheryas ti kerwn
ti dandiyas lin
sap.
Mw tradis lin pheryas ti kerwn
ti pwrwl hwnietsi chwlhwy
opra lindi.
Ama lintsa na ma inkis shwrwsti -
lalurrilili barvwypnastar.
Ama ti dikhisa lin angla
Chovrrimnasti draba te kerla,
birdem mw len ti kerwn pheryas,
of, Gomisarniya i ekhiskerdi lenin.
144.
U sap te bandzila
si tamam dyuzi i sapiskw hwveti.
I len, te bandzila,
si tamam dyuzi i deryaviski.
Manusha, te bandzina, te sini patserdi pw gomisarniski
si tamam dyuzya
Liski!
212.
Ma astar tut
i bhakhtisa.
Chshinna sar jaga
kana tsidila
ti kanatu irizila
pali chshinna.
Ti thois vas torru
andu akhurru sapisa andrw
dwy na ma ovil tuki nikachshi?
468.
Phyava u pwy, konisa nwerasa changa Twrrw
hava u hamus, kontu dyasa lis Tuki
ti vakerava mangi: Twrri si, sourru torru si -
iduya, zhivotus, rwzi.
Gomisarnu morru si sar hwriy,
te lela u agorw prushuka da te dena laki u manusha
ti na mangila pheryasa,
astali mangila -
kwka si Gomisarnu morru i lenin te ekhiskerna pis.
555.
Devela gazhkani
sa loyzina
angla manushwngw darwndi.
Ti vakerws lingi „Zhan tumingi”
khek lindar na zhana piski.
Avera pali sini hwnietsya sar zhukli.
So mw den tuki
kisali devela,
te zhivindzina denipindar manushwngw,
of, Gomisarniya i lenin te ekhiskerna pis?
563.
Hlemeka Devel si.
Barr i dromisti si Devel.
Devel si i kangiy.
I pratyancha si Devel
U bakwri si Devel,
akhorru da si Devel.
Devela, devela, kidibor but oli,
ta nanwy kati ti oshtikerws.
Sade ekh Devel isi. Amaru Gomisarnu
i lenin te ekhiskerna pis.
586.
Andw brahmwyskw kherwsti
katutu parvarna i yag
santsan devel si,
kanatu i yag barila
ti thabila u kher,
chshena opra listi
pwy lenatar
ti chshar dromistar,
andw dukhindi marna pu gyuysi
ti rivizina i charadati.
Bisterna pu adar kwli manusha
ti dena pis i pwrrw yagasa
of, Gomisarniya i lenin te ekhiskerna pis!
820.
U barvali
mw kerwn mandirya i Shivaski.
Pali me,
u chovrru,
so ti kera?
Mw changa sini diretsya,
mw masa – somnalnu than i khangireti,
mu shoru -
somnalnu gumbat.
Shun, of, Gomisarniya i lenin te ekhiskerna pis:
kuka te vadila pis mw pwrwl,
kuka te phirla mw achshwl eternis.
Devara Dasimaya
23.
Andw perr dweku
u kwzwy na punjarla
laku muy,
ne pali odiya
lisku.
Andi maya i kwli dunnyasti
manush na punjarla Gomisarnis,
ne pali lis u Gomisarnu punjarla,
Ramanatha.
26.
Yag
andu her kerzeripi, dikhipi ti pheryas.
Mashkar mursh ti zhuvel -
yag.
Andi strakina hamusa
nigaldu palal vakerdu „na kamava” -
yag.
Andu nashalzipi i kulisa te si linu -
yag.
Ti andu kovrrimnasti i ekhipnastar -
yag.
Dyan amingi
panch yaga
ti chik andw mosti,
of, Ramanatha.
44.
Soski si mangi
chshuri ti inkera mw vastindi,
of, Gomisarniya?
Sostar ti inkala lis,
so ti bhokna,
kanatu Tu syan u dunnyas sastu,
of, Ramanatha?
80.
I chik si denipi Tutar,
syamus te inkila – Tutar denipi,
Balval te phudila – Tutar denipi.
Sar ti anoviza kuli zhukela,
te hana Tw vastistar,
pali zieskerna her aver?
120.
U masa inkerava me,
u solutsi Tu inkersa.
Tu zhansa u garazipya mwrrw maswsti,
zhanava me u garazipya Twrrw solutsisti.
Kudwliski u mas Torru
si andw mandi.
Tu zhansa
ti me zhanava, Ramanatha,
miriklu
twrrw solutsisti
andu mas morru.
121.
Devliya i mwrrw jinsisti,
mw pwrrw mw oshtikerwn sade otka,
katutu pwrrw Twrrw
anglal te olili:
man nanwy mwrrw pwrrw.
Dwy si shiyzimi u getvereya
kwkwli themistar ti zhanin
u miriklis, u ekhipi
Twrrw pwrrwndi
ti mwrrw,
Ramanatha?
123.
Kana syan maswsa -
mw bokhwys.
Kana syan maswsa -
mw hohwys.
Of, Tu, ma asa mantsa,
ma ker man chik pali,
ta mas isi man:
komi ekh drom dal andw maswsti
ti dikhis
sar si,
Ramanatha.
133.
Kana dikhina
barw bala ti chucha ti barin,
vakerna: zhuvel si.
Kana dikhina chshora
vakerna: mursh sinu.
Ama dikh – ozi, te urala
mashkara lindi,
Ne mursh si,
ne zhuvel,
Of. Ramanatha.
144.
Bas ti chshinis
dondi
ti telunu agor ti kerws zhuvel,
u oprunu – mursh;
mor lin ekh-averwsti,
zhi kanatu alwyn:
ha, akana vaker
i nevi yag bendzi
dwy si murshikwy, ya pali zhuvikwy,
of, Ramanatha?
Mahadeviakka
2.
Sartu
manzin, garazi phuveti,
lastipi i benimnasti,
somnal i barrwsti,
tssil andw syamusti
u Sa-ekh si katimwya horr
andw ilisti.
Bizhandi sini
u droma amarw Gomisarnisti
parnu sar yasmiy.
11.
Sar thuth
andw pwisti syan tu: na shi vakerava
kon si anglal,
kon pala kwlis;
kon si gomisarnu,
das kon si;
kon si baru,
kon tsikurru.
Of, Gomisarniya parnu sar yasmiy,
tsira ti si, ti dehila Tut
ti zieskerla Tut oda,
dwy na ma aviskerwl piski oda
rakshaswsku kuvetsi?
18.
Nanwy karig ekh ti duy, karig trin ya shtar,
ami karig ohtodeshvar ti shtar guna shwl ti guna siyada minja
wimasli;
karig sa-ekh themin
wimasli,
parvarzi
dukhatar ti hanjatar.
Swytu ti ovinasli
mw anglalni bendzipya,
ov karig mandi dwyalu
andu kwka ekhurru zeswsti,
of, Gomisarniya
parnu sar yasmiy.
50.
Kanatu man na punjaravas,
kati syanas Tu?
Sar varna somnalisti
andw mandi syanas Tu.
Tuti dikhim,
Gomisarniya parnu sar yasmiysti,
miriklu i Torru „kwtka sim”
andw mandi
sastu.
65.
Ti uran pasiya
mw sanwyru ta sini parvardi trushwypi morru ti barvwypi morru.
Ti pwrwn syunda,
mw sanwyru, ta pwrla pwy opra mandi ti nwera man.
Ti tradil u bwiri opra mandi,
mw sanwyru, ta si luluzi astsyal mw balingi:
Of, Gomisarniya parnu sar yasmiy,
ti pwrwl shoru morru mw kakindar,
mw sanwuru ta si denipi Tuki astsyal.
69.
Of, dwe, tharavas
yagati bi alwymnasa;
of, dwe, dukhavas
yaratar bi ratisa;
chshimas man, dwe
bigudimnasa:
dehimnasa karig
u Gomisarnu morru, parnu sar yasmiy,
pirrimas karig swy nanwy themindi.
75.
Syan u vesh Tu,
syan Tu sourrw vidwya shwlwbreshwngw
andw veshtisti,
syan Tu chiriklu ti hwyvwy divichimi
te khelna mashkara vidwin
ti avryal lin.
Of, Gomisarniya parnu sar yasmiy
te phersa ti pherdu sourrwsa,
soski na dishwysa mangi
u muy Torru?
79.
Tuki dukhava
i sasti shtar kotora i zeswsti.
Dii sim
i sasti shtarw kotora i ratseti
Pashi sim nashalzi,
bilazi Tuki zes ti rat,
of, Gomisarniya parnu sar yasmiy.
Sartu phoswyan tu dehibi
bisterimtar indra
bisterimtar bokhwypi ti trush.
88.
Tsindzyas Oda mu ilu,
chshorikeryas mw masa, lyas sar denipi
mw gudipya,
choryan sourru morru
zhi agor.
Me sim i phirremi
i mwrrw Gomisarnisti, parnu sar yasmiy.
104.
Zhi kanatu na aviskerws tuki
zhanipi i lachshwski ti khwyniski,
sourru si
mas i hanjaki,
kher hoimnasti,
prangis i barwhulaki,
kher hanjaki,
taraba i garvasiymnasti,
hohandu muy i kaskanimnasti.
Ti na zhanis ti na nashalzis u zhanipi kwliski
na ma punjarws
Gomisarnis parnu sar yasmiy.
114.
Rrom andral,
phirryamlu avryal -
na shi zhivindzava donintsa.
Themi kwka
ti kuka aver -
na shi zhivindzava donintsa.
Of, Gomisarniya parnu sar yasmiy,
na shi astarava ekhi vastisa
baru akhor da
ti harru longu.
317.
Beshtuli opra veshtisku nilwysku sapfiri
chshurmuthiskw barrwntsa sar pantofya,
phuzyali longi shinga,
of, Shiva
kana mw dya Tut angwy
mashkara mw chuchindi?
Of, Gomisarniya parnu sar yasmiy,
kana mw trada pala Tuti,
bi ti lazha mw maswndar,
bi ti lazha mw kamatar?
323.
Karig u drom dikhava -
kana mw avil piski.
Oda ti na avil
hepten mw bilwya ti hepten mw nashalzya.
Of, dwe, ti sinu dur mandar,
rat da ti ovil,
mw ova sar dehimnangu chiriklu
chuchw angwintsa.
Allama Prabhu
213.
Sastsi khangirisa [mandirisa]
andu kwka maswsti,
soski si tuki aver?
Nikon duy na mangila.
Of, Gomisarniya i barrwskw hwvindi [gufindi]
ti syan barr Tu,
me so sim?
459.
Dunnyas tssiila kana sanwyru,
ta parhuzyasli sourrw uchshala.
Dwy si shiyzimis uchshala
u donipwrrwngw manushwn ti mwrwn?
Ti hahwys diynu khwtar
opral chora manushws i perdalnu kinara,
dwy oda mulu mw pwrwl?
Kwna manusha na zhanna
garwypi,
phoswybi indriymnasku;
dwy amaru Gomisarnu gufindi
mw zhivinskerwl pis,
soskutu odwna mangina kwlis?
537.
Ziswskw yaga aladi veshtis,
veshtiskw yaga aladi u zis.
Shun, shun alwybya
i shtarw rigindi.
Khelna bangis, hemen-hemen dikhina pis mashkara lindi
siyada masa kheimnasa,
mwrna bigendi droma.
Of, Gomisarniya i gufindi.
629.
Ekh mwrla,
aver igala lis te morya,
zhi kanatu u triinu na lela lin i don
ti na tharla lin.
Nikon na zhanna kon dulha si [rrom te piltseyla],
ne pali borrorri.
Meribi
pelu opra bevisti.
Anglal luluzya ti bangin
u piltseymnangu syas mulu.
Gomisarniya, sade manusha Twrrw, te phirna pala Tuti
meribi na zhanna.
668.
Balval astaryas lis indra
zabanas liski syundiskw ziya indriymnangw [soimnaskw].
I loka soila
ti biagorwsku duralipi
dela liski chuchi
thuth ti pel.
Syunda potwyzina.
I ziy soimnaski bitti.
U Gomisarnu si,
santsan nanwy lis.
809.
Khek vakerna,
ta dikhlili Lis.
So si Oda -
kham opra amindi,
phirribi chwlhwindi?
Gomisarnu i gufingi
zhivindzila andw ziswsti
i chshurmuthiskw veshtisti.
959.
Parvar i chovrrwn,
vaker u chachuypi,
khidi pwy
i trushali manushwngi,
vadi shternis andw ziswsti -
shiyzimis kide mw zhas andi svarga
kana mwrsa,
ama kide da mw ovis dur
i Gomisarniskw chachuymnastar.
Pali kuliski, kontu punjarla Gomisarnis,
fwydas nanwy.
Irizyas S. Savchev
