Irizipya Translations

MAHABHARATA

Agus rromani chshibati

VIRATAPARVA

 ya

 IL I VIRATISKI

(Kotor)

 Rromisimo i Viratiskw thagaripnasti

 Shoru 1

 U Janamejaya vakeryas:

1 Sar zhivindzinali mwrrw dadin, achshilili bipunjardi, andw Viratiskw (thagarwskw) ziswsti, dukhani i trashatar angla Duryodhanis?

U Vayshampayana vakeryas:

2-6 Kide denimya (devlistar) Dharmas[tar], u Yudhishthira, u en lachshu kanunisku loyzimnu, irizyas pis andw kherwymnasku beshimnasti porru ti mothwyas astsyal sourru kwlis te oluli i brahmanindi. Ti  rromizyasli lingi i sourrw kwliski, oda dyas i purohitakiski (u manush te loyzila i somnwy [dharmikwy] yag) duy rruya (konintsa shi alayzila pis yag). Ozaman u kochalisku thagar Yudhishthiras, chshov (i devliski) Dharmas, khizyasli ekhisti pw sourrw terni phralin ti irizyasli pis karig lindi, of tu, te syan bendu i Bharatindar, vakeryas kide: “Ipaldi thagarimnastar, amin nakhistsyam an kwli deshuduy bresha (andw suti veshtisti). Ti akutu alu u pharu deshutriningu (bresh), kontu amin mw nakhas barw pharipintsa. Kudwliski, of, Arjuna, te syan chshov Kuntisku, chun [disha] kisalu than amingi, katutu amin mw zhivindzas bipunjardi amarw dushmwyndar”.

U Arjunas vakeryas:

7-10 Naiskerdi Dharmistar, of, gomisarniya manushwngu, amin mw phiras mashkar i zhwnin bipunjardi, of, mandakuya jinsistar Bharata! Sourru i (amaru) beshimnaski me mw disha tuki kheka thagaripin, sourrw en lachshw ti korkorrimnangw; tu sade chun khek lindar. Turyal (rajakeripin) kauravingi alakhina pis shukar thagaripin, barvali hamuntsa ti manushwntsa sar kisali zhwnin [jana] sartu sini u panchaluya, u cheduya ti u matsuya, u shurasenuya ti pachattaruya, u dasharnuya ti Navarashtruya, u maluya, u shalviya, u yugondhatuya. Kon kwkwlindar, of, thagarwya mw dishwys astsyal amarw beshimnaski, ta ti shiyzas ti nakhas i breshws, of, thagarwngu thagarwya?

U Yudhishthira vakeryas:

11-15 Kwka si kide, of, mahakuvetsingwya! Sartu vakeryas u maha gomisarimnan­gu, u gomisarnu i sourrw zhivzipingi, kide (mw ovil) ti aver na ma ovil. Ti bi ti ovil swytu duiskeribi, sourrw amin, ekhisti dyamli amin gozi, mw alakhas than amarw beshimnaski – lashchu, korkorrimnangu ti bihoimnasku, katutu na ma ti ovil opra amindi [amarw shwrwndi] niswy trash. Thagar matsingu, u but puranu Virata, mahakuvetsingu, nyayapriyakanu ti barwozingu manush, si bu barvalu ti oda mw shiyzil ti loyzil i pandavin. Andu en baru zis Viratis­ku, of, chshaviya morru, kana keravas busti liki sar baru manush, otka mw zhivindzas u bresh kuka, of, palalnukwzwy Bharatisku! Swytu ti ovil butsi ti kerwl her amindi liki, ko mi her amindar ti mothwyl i papalnikwzwyngi jinsistar Kuru!

U Arjunas vakeryas:

16-18 Of, devliya mashkara manushwndi, sar mw kerws butsi astsyal liski andu tha­garipi lisku ti so mw kerws pash kudwli thagarws, of, te syan gudludharmaku? Tu syan shukar ti paku manush, but desa, na vadisa tu nak, nyayapriyaku syan ti olwysa tut averwndar twrrw bitrashwymnasa. Kide patuyzimi nanwypnastar, of, thagarwya, so mw kerws tu, of, pandava?

Arjuna moli prestolonaslednika-1

Арджуна казва на престолонаследника Уттара да държи конете на разстояние от стрелите на вражеската войска. Илюстрация на Панта Пратинидхи от Критическото издание на „Махабхарата“, книга Четвърта – „Виратапарва“. Пума, Индия, 1936.

U Yudhishthiras vakeryas:

19-23 Shunin man, of, papalnikwzwyn jinsistar Kuru, me mw kera swytu ti ovil bu­tsi pash i thagarws Virata, te sinu mandakus mashkara i manushwn. Mw ova ekh mashkara manushwndar liskw i kudwli somnalnikochalingu thagarws, ti mw disha man angla listi sar brahmwy anovisa Kanka, but lachshws te khella kokalangw zaruintsa sar manush, kontu but seveyru ti khelil kwkwli khelwypnasti. Me mw chshya kerdi barrwstar vaydurya, somnal ti filuingw kokalandar shukara khelwymnangw zaruya – kali ti loli, hramusardi (opra lindi) yakhintsa, te sini kuchw barwsa joytirasa. “Me anglisarla simas amal i Yudhishthiraswsa”, – kide mw vakera i thagarwski, ti puchwla man. Ti kide, me rromizim tumingi kwliski, sar mw zhivindza me (pash u barwkherws [binas] i thagar Virata). Of, Vrikodara, ami tu so mw kerws, sar mw nakhin u zesa twrrw pash i Viratis?

 Kide rromizila pis andu agu shoru Il Viratiski i Enbarw [maha] ilistar Mahabharata.

Andral 51-52, 2008

Shoru IV

U Yudhishthiras vakeryas:
1-5 Amin veki zhanasa so mangseyla pis ti keras her amindar. Ti kana dyava man gozi, sanwyrum, ta kwka si lachshu. Komi amaru kherwynu purohi­taku manush ekhisa i manushwntsa te kerna habi ti manushwntsa te phi­­rwyna pw yakha sar phirla i sastsi kherwski butsi ti loyzin ama­rw somnalni yaga andu binas Drupadingu. Pali kwkwna (manusha te phirdi amintsa) ti agunizilas lin u Indrasenas komi sigu ti len u drom karig Dvaravati chuchw twligintsa [rathintsa] – kisalu si morru andariamin. Pali kwna zhuvela – sourrw hwlwinkin Draupadakw – komi ekhisti i manu­shwntsa te kerna habi ti i manushwntsa te loyzina u kher ti len u drom karig i panchalin. Ti sourrw odwna mangseyla pis an kide ti kerwn pheryas: “Astsyal pandavingi na zhanna pis nikachshi, soskutu sourrw, kana oladi amin, lini pu drom katar (jhil) Dvaytavana”.

U Dhaumya vakeryas:
6-15 Amala shi ti kerwn pheryas kwliski da, kontu zhanna pis sourrwndar. Kudwliski me mw vakera ekh-aver. Den tumin gozi! Me kerava pheryas astsyal manushwn kontu tasya mw ovin thagara, astsyal tumaru zhivotus­ti pash i thagarws Virata: sar ti na ovil khwynis, kana dalsa mashkara i thagarwski familiya ti kersa butsi sar hwlwinis. Zori mw ovil (tumin­gi), of, kauravya, ti zhivindzin andu thagarwsku binas sastu bresh ti (ti achshwn) bipunjardi kudwlindar, kontu mangina ti punjarwn tumin ti (ekhisti kwkwlisa ti nakhis u zesa) nanwy sar tasyatnu thagar, sartu prepila tuma­rw jinsisti. Mw mangseyl pis kana dalna katimwya andu binas, ti mangin anumati ti achshwn, ama ti na dishwyn tumin sartu swy ti ovin manusha, ami ti dishwyn tumin sar manusha te loydi pw andralni gunin. Na ma ovil shiyzimis ti beshws i thanisti, kontu mw mangil lis aver. Na ma ovil shiy­zimi ti beshws andi twliga (thagarrwski), ne te than lisku, ne te skomya­nusti (lisku), ne opra liskw hathisti ya liskw rathisti – sade manush, kontu kide mw dishwykerwl pis, sade oda mw ovil shiyzimis ti beshwl ti ti zhivindzil andu thagarwsku binas. Kontu nikana na beshwla otka, katutu lisku dishwypi sar manush mw shiyzil ti aviskerwl duiskeripi andw khwyni manushwndi, sade oda mw ovil shiyzimi ti zhivindzil andu thagarwsku binas. Ti nikana na shi dena gozi i thagarwski. Ti puchwl tumin – kwka aver, ama kana na puchwla tumin – mw potwyzin turyal listi ti mw den liski sourru oda te mangila, tumin mw ovin liskw manusha. Soskutu u thagara mesherna kulin kontu kerna hohandi pheryasa ti tiraskarikerna u zhwni, te dena hohandzi gozi. Gozever manush nikana na ovila ti phandil amalipi zhuvelintsa kwkwlingi, kontu zhivindzina andu thagarwsku binas, ne pali kwkwlintsa, kontu nanwy (thagarwskw amala) ya pali kontu lis na mangina, dushmwya liskw. Komi sade i gozeverw thagarws ti den i en tsikurru da, oda te mangila lis. Ti kanatu kide dishwy­kersa tut mamuy listi, sade ozaman mw ovil shiyzimi ti zhivindzis i liskw binasti.

16-24 I thagarwski mangseyla pis ti kerws butsi sartu u Agni ya (aver) devel, ekhi pheryaswsa – lachshws ker butsi bi ti tssiis, soskutu ti na kerws lachshws i butsi twrri, shiyzimi si oda ti mudarwl tut da. Ti sotu vakerla u thagar – oda si chachukanu. Na ovila ti kerws lisa ne maraza, ne ti kerws i butsi khwynis, ne ti na des liski chokat ya pali ti ovis hoynalu angla listi. Kana puchwla tut chshipas, vaker liski upayogakw ti manohariskw habe­rya, ama upayogakw vaker liski ti ovin namanohariskw da. Karig listi ov lachshw ozisa andw sourrw liskw butsindi ti phenibindi ti kana konushey­rusa lisa ma vaker liski namanohariskw haberya ya haberya kontu mw hoyzin lis. Sa phen tuki: “Me na sim priyakanu liski” – komi liski ti kerwl butsi yogaku; satarkanu ti utsahaku ti kerwl kuka, kontu si upayogaku ti manoha­risku liski. […]

25-35 Ma vaker piski “me kerim but astsyal thagaripnasti” ya pali “me sim go­zever”; sade kana kersa chshipas manoharisku mw ovis dehimnu thaga­rwstar ti mw ovis bahtalu. Kana rwswsa uchipi, kontu rwswla pis barw zorisa ti kanatu thagar sinu lachshu manush karig tuti, ker astsyal liski sade lachshw butsya tu da. […] Nikana angla listi ma bandzer tu muy, tu vakeribi ti na ovil chuchu, di chik ti chshungadi sade bishundis. Ti ovila angla tuti chshipas aswymnasku, na ovila ti prashansakerws atikanis ya pali ti asas sar diynu. Na ovila ti ovis hepten sahasi, soskutu mw vadis tu nak. […] Sikidu manush, kontu zhivindzila andu binas, bi ti zaprizil mangseyla pis ti kerwl thagarwsku zhivotus gudimnasku. […] Manush kon­tu sevakerla thagarwski ya pali zhivindzila andw liskw phuvindi, ko­mi, ti dikhila naanglal, ti uchwykerwl gunin thagarwskw andw liskw ekhindi ya pali pala liskw dumisti. Kontu mangila zoralimnasa ti tradil i thagarws ti bandzil angla listi ti kwlisa ti rwswl chshipas astsyal pisti, na shi achshwla pash i thagarws longu vakwtsi ti si shiyzimi ti ovil khwypi lisa.

36-44 Phenibnasa piski komi nikana na konusheyru thagarwsa astsyal (kerzi­pya), kontu khoswyna aver manush ti nikana ti na olwyl i thagarws andu vakwtsi maribnasti ne pali ti inkil angla listi. Kontu si sa zhangadu, kuve­tsingu, bitrashadu sa ti phirwl pala (i gomisarnis porru) sar uchshal…[…] Kontu korkorru inkila anglal, kanatu mangseyla pis ti kerwl pis chshipas ti igala aver pheryaswntsa: “Komi me ti kera kwlis!”, sade oda si yogi­kanu ti zhivindzil i thagarwskw binasti. Kontu andu tatsipi ya shilwypi, ratsya­sa ya pali zeswsti lela andw pisti u andariamin thagarwsku, sade oda si shiyzimi ti beshwl andu binas. Kontu kana si avryal thagarwsku kherws­ti na iperla pw indwin ti nakiskerla u pharw olupin ti aviskerla piski bahtwy­pi, sade oda si yogikanu ti si shiyzimi ti zhivindzil pash i thagarws. Oda na shi urela tsavala sar (u thagar), na ovila ti asal shundis angla listi, na ovila ti del gozi, kontu si biarzhwy – sade ozaman oda mw ovil kuchu manush astsyal i thagarws. Kanatu mangina chshipas listar, ti na del pis gozi “so si mangi lachshu ti sar me mw ova kwkwlisa barvalu”, ami ti del pis gozi so si shiyzimi ti ovil lisa – phandzipi porru ya porru mudaripi… Komi sa ti ovil lis shiyzipi ti lel twliga, tsavala, urebya ti avera butsya, kontu (thagar) dishwyla angla manushwndi sar thagar – sade oda si shiy­zimi ti ovil “pisku manush” i thagarwsti. Mw ovil shiyzimi ti zhivindzin kisalu bresh [zhivotus] andu binas i thagarwsti Virata, mw chshavi? Ti palal kwlis ti irizin (pali) tumaru thagaripi, mw zhivindzin sartu tumin mangina.

U Yudhishthiras vakeryas:
45-46 Tu keryan pheryas sartu mangseyla! Nikon na shi kerlas kisalu pheryas, sade i dwy Kunti ti u butigozever Viduras. Amin irizasa karig tuti ti kerws sourru, sotu mangseyla, ta ti nakhas u khwypya te uzharna amin andw dromisti (amaru) karig u vijwypi (amaru).

U Vayshampayanas vakeryas:
47-49 Ti kanatu shundzyas kwlis, te vakeryas lingi u Dhaumya, u enlachshu i duydromabendindar keryas sourru te mangseyla pis adetsindar anglal odw­na ti len u drom. Ti kana alwyas u somnalni yaga, oda keryas kangireku thavzipi ekhisa somnalni pheraswntsa phenibisa u pandavin ti kerwn sourru (sotu) mangina ti ti ovin gomisarni i sastsi phuveti. Ti kana trazyas bayakwy rigatar karig dayakwy rigati turyal somnalni yagati ti turyal i brahmanin da, barvali phiribintsa andw somnalni [khangirekw] thanin, ti kanatu thodi en anglal i Yajnyasenis, palal kwlis u sourrw shov pandavin lini u drom karig i Viratis.

Kide rromizila shtarwsku shoru Il Viratiski i Enbarw [maha] ilistar Mahabharata.

Shoru V

U Vayshampayanas vakeryas:
1-6 Kustsikerdi barw chshurintsa [talvarintsa], chshaviya morru, ladadi (avera) bundukiintsa ti mortsikani sivdi torbadis, katutu thoina pis tira mortsikani loyzipintsa astsyal i agu angushtisti (te loyzina ti na chalwyl tut i tetiva [pratyancha]), thodi i baya vastisti, u shov pandavin lini i rig karig i len Kalindi. Palal kwlis kwna manusha te chshena tira [tirajedis] avilili phirin­dus i tatsi­p­ni (lenakw) kinarati, alakhlili garazipi andw veshtindi nikon te na shi zhalasli ti dallasli. Kana chalwynali veshtiskw chirikli, u barwkuve­tsingw pandavya (nakhidilili) andar (thagaripi) yakrilomin ti shurasenin, (muklili) palal baya rigati u dasharnin ti daya rigati – i panchalin. Katutu nakhinali vakernali piski ta sini manusha te phirna andw veshtisti ti asta­rwn hwyvwyn ti chiriklin. Oladili i vesh, odwna daldili andu (thagaripi) Matsya. Ti kanatu rwstili otka, i Krishna vakeryasli i thagarwski (Yudhishthiraski): “Kwtka dishwyna pis droma ti swy nanwy umalin. U en baru zis sinu panda but dur. Ti zaprizas ti pashas rima, soskutu veki tssiimtar”.

U Yudhishthiras vakeryas:
7 Of, Dhananjaya, vadi i Panchalingi thagarwski chshwy ti phira la, of, Bharatisku palalipniya! Sade kana olasa kwka vesh, mw ovil shiyzimi ti beshwykeras amin andu Viratisku enbarw ziswsti.

U Vayshampayanas vakeryas:
8-11 Sartu hatha te agunizila hathin u Arjunas sigu vazyas i Draupadi ti rwstuli u agorwskw thana i enbarw ziswsti mukyas la (phuveti). Ti kanatu sourrw alili pash lindi, Kuntisku chshov vakeryas i Arjunaski: “Kati mw thovas amarw bundukiin anglal ti dalas ziswsti? Ti dalas, chshaviya morru, bundukiintsa, u mansuha kana dikhina amin mw astarwl lin trash amindar – hich nanwy man duiskeripi. Sade ekh amindar ti ovil punjardu i manu­shwndar, ozaman amin u sourrw mw mangseil ti olas amin andw veshtisti panda deshuduy bresha, soskutu kisalu zhin (dyam)”.

U Arjunas vakeryas:
12-14 Akutu, manushwngu gomisarniya, te bwiri, pashw i thanisti te tharna i mulin – but baru butipatrinisku vidwy shami, na shi dalsa mashkara liskw salchin, kidibor but ti barw sini. Manusha da nanwy, of, thagarwya. Barila rigati i dromistar da, andw veshtisti, katutu isi but hwyvwya ti sapa. Ti garas amarw bundukiin ti ti lyas u drom karig i barw ziswsti. Ti otka mw zhivindzas lachshws, of, Bharatisku palalipniya!

U Vayshampayanas vakeryas:
15-24 Kana mothwyas kide i thagarws Yudhishtiras, nyayapriyaku, oda asta­ryas ti mukil (otka) bundukiin, of, te syan mandakus jinsistar Bharata! Ti Arjunas, Kurusku palalipnu, mukyas i tetiva [pratyancha] pwrri i buti barw harrwsti gandiva, te bashalla butishundis, lisa ti ekhi-ekjiski rathasa te muda­­ryas charada dushmwyn ti loyzila i manushwn te na sini salda­tsya, u Arjunas, kontu vijwyas devela, manusha ti ushap ti thoyasli telal pw pwrrwndi buti thagaripin. Pali u Yudhishthiras mukyas i eterni tetiva [pratyancha] kwkwli harrwsti, konisa oda, baru heroi, loyzilas u duralipi Kurukshetra. Pali u maha Bhimasenas mukyas u kombus kuli harrwsti, konisa vijwyas kana maryas pis i panchalintsa ti asharyas u gomisarnu Sindhu, of, bibezahisku te syan, ami kana thoilas i phuvya tela pw pwrrwndi, korkorru marlas pis buticharadingw dushmwyntsa; kana shunnas shundzi­pi liskw gandivatar, kontu prepilas sar dwnnwypi palal sevibisti ya pali sartu shunna pis kana pwrna barw yuva katar veshtikaku uchipnastar – kide prastanas u dushmwya liskw oda kana inkilas ti marwl pis lintsa. […] Pali u kochalisku Sahadevas mukyas i tetiva porru harrwsa, konisa parajitke­ryas thagaripya te si tatsipi. Ekhisa harrwntsa odwna mukli otka u longi chshurin, puchshardi tsilisa ti na astarwn lin jang, kuchw torbadis te thoina andw lindi tira ti tira, te chshinna sar chshuri.

25-31 Inkistuli i vidwisti, u Nakulas korkorru thoyas otka u harra andw thanindi kontu syas en garadi ti katutu na ma dikhinas lin gazhkani yakha, katutu na ma del lin brishind ti zoralis phandzyas lin salchinindi. U pandavya ombladili otka masa muli manushwsti ti khandil khwynis, ta manusha kana nakhina turyal ti vakerwn piski: “A-a-a otka but khwynis khandila, achsh ti na nakhas pashw i kuka vijwisti shami”. “Otka omblwyam shwl ti oh­todeshvar breshwski amari dwy – kisalu si amaru adetsi, kontu garasa amarw dadindar ti papundar”. Kide kernali pheryas ti ahwykernali u pandavya herw manushwndi – zhi manushwn da, kontu phirna hwyvwyntsa ti chsharikerna lin andw duralipin ti veshtin. Ti ozaman u parthya, dushmwyskw mudarni, alili pashw i barw ziswsti. U Yudhishthiras dyas pis ti lingi garadi anova: “Jaya, Jayanta, Vijaya, Jayatsena ti Jayatbala”. Palal odwna daldi andu barw ziswsti, patsimnasa ta otka mw beshwykerwn u deshutriningu bresh andu (kwka) thaga­ripi bipunjardi, sartu dini lingi pheryas.

Kide rromizila panjwsku shoru Il Viratiski i Enbarw [maha] ilistar Mahabharata.

Shorru VI

U Vayshampayanas vakeryas:
1-6 Ti kanatu garwyas telal tsavalandi somnalni khelwymnangw zaruya opra konindi isyas thodi kuchw barra vaydurya ti kanatu thoyas lin telwy khakatar pwrri, u gunaku thagar Yudhishthiras, te isyas lis buti kwzwyn ti kwkwlisa kerlas kauravingu jinsi panda bubutimanushwn­gu, te syas but trashnu, sar ushap, kana syas hoymi, kuka mandakus mashkara mur-­ shwn, te syas mahakuvetsingu ti isyas lis shukaripi, serbezlwtsi sar bi­merimnangu, (akana) te prepilas sar kham turyal konisti phirwynas pis bulutsya, ya pali yag, pucharzi chsharwsa, dishwyas pis agu, u baru gomi­sarnu manushwngi, karig butishundu gomisarnu thagarimnasti – Viratas, – kontu syas beshtu andi bari swi khizipingi ti motwybingi. Kana dikhyas u pandavas, kontu dishwyas pis yakapancha sar chshurmuth, garadu bulu­tsindar, u thagar Viratas lyas ti puchwl pwrrw manusha te denas lis gozi ti u dodromabendi, beshti lisa otka ekhisa i manushwntsa te tradinas lingw twligin ti i vayshiin: “Kwka kon si? Agu drom dalla kwtka, pali sourrw lis dikhina! Oda na shi sinu dodromabendu, oda sinu enshukar murshwndar ya phuveku gomisarnu – me kide sanwyrum. Lis nanwy ne das, ne twliga, ne chwn, pali si sar kham, sar sastu-korkorru Indras. Ti nishwya opra liskw maswsti mothwyna, ta opra liskw shwrwsti si kerdu bahtwykerzimnangu adetsi. Kide sanwy­rum. Oda alu karig mandi bi swytu ti ovil duiskeribnasa, sartu butiprastadu hatha kamasa zhala karig u pwy, pherdu lachshw­khandzimnangw lotosuin”.

7-9 Ti sartu u Viratas kerlas kide pheryas, u Yudhishthiras, kwka mandakus mashkara i murshwndar, kana alu zhi listi, vakeryas: “Of, gomisar­niya, zhan, ta me sim duydromabendu, kontu nashwyas porru barvalipi ti alu ti aviske­rwl piski astali, ta ti zhivindzil pw butsyatar. Me mangava ti besha pash tuti, of, purnakwy te syan, ti kera kuka, sartu vakerla mangi gozi, of, gomisarniya”! Palal kwlis me mothwim liski loshadu: “Ti ovis sastu-vestu! Pash mangi ker butsi swytu mangisa tu. Ta ti ahwys, ta sim lachshw ozisa karig tuti, chshaviya, me puchava tut katar wyan kwtka? Vaker kon si torru jinsi, anov torru ti so shiyzisa ti kerws en lachshws”.

U Yudhishthiras vakeryas:
10 Ekh vakwtsi simas aver Yudhishthiras. Panda kwlistar, me sim brahmwy, morru jinsi si Vayyaghrapadya. Me sim kelwymnangu zaruintsa. Anov morru si Kanka, of, Virata!

U Viratas vakeryas:
11 Me mw dya tuki kuka, sotu mangisa. Gomisar i matsin – karig tuti isi man vishvas. Me ahwyava u zhwni te khelna komari, mangi u masturuya kwli khelwybnasti sini manohariskw, pali tuki, te prepisa i devlingi, prepila tuki ti ovis thagar.

U Yudhishthiras vakeryas:
12 Komi na ahwykeras, of, gomisarniya manushwngi, i zhwnin i harni var­nindar u uchi (khelwybnaski kwla zaruintsa). Ti komi nikon, te mw nandzis­kera [te mw lya liski sourru] (andu khelwybi), nikana ti na kerwl chshipas khwynis mangi. Komi an kwka ti ovil torru denipi karig mandi.

U Viratas vakeryas:
13-15 Me mw mudara i manushws te na shi khosws lis ti kerwl tuki khwypi, pali duydromabendi (ti kerwn tuki chshipas khwynu) mw ipala morru thagari­p­nastar. Sourrw ti shunin te si khidi kwtka: u Kankas sinu gomisarnu andu thagaripi morru, sartu sim me. Tu (of, Kanka), mw ovis amal morru, mw phirwys tut zhi mandi andw mw twligati, mw ures tut buti tsavalantsa ti mw has ti pes sotu mangisa. Mw mangseil tu sa ti phirrwys tw yakha (sourrwski kwtka te ovila) – andral ti avryal. Ti tuki (sourrw) dara sini phirradi. Khek ti irizil pis karig tuti, ta nanwy lis so ti hal, mangava ti vakerws mangi liskw motwybya. Ti me mw dya lingi (sotu mangseyla). Ti na ovil tut trash mandar.

U Vayshampayanas vakeryas:
16 Kide, kana dini lis denipya ti kanatu ahwykeryas pis i thagarwsa Viratas, kwka heroi, mandakus mashkara manushwn, zhivinseylu bahtwymnasa ti barvalimnasa. Ti nikon na shi punjarlas (lis).

Kide rromizila shovisku shoru Il Viratiski i Enbarw [maha] ilistar Mahabharata.

Draupadi v obraza na prisluzhnitsa

Драупади в образа на прислужница с плач се отправя за вино в жилището на Кичака. Илюстрация на Панта Пратинидхи из Критическото издание на „Махабхарата“, книга Четвърта – „Виратапарва“, Пуна, Индия, 1936.

Shorru VII

U Vayshampayanas vakeryas:
1-5 Palal kwlis u aver (pandavas), te isyas lis trashnu kuvetsi, shukar sar kham, alu pash (thagarws) aslwysku phiribnasa, astaryali andw vastisti hlemeka ti rruy ti inkaldu talvari kala-nilwyski nokasa ti bi swy ti ovil danimnasa. Prepilas manushwsti te kerla habya ti kana thavdilas tsibrin sourrwndi turyal sar kham – kwka dunnyas kali tsavalantsa, kuvetsisa sar hathaku thagar, oda, kana alu pashw i matsingu thagarwsti, zapriseylu angla listi. Kana dikhyas lis, u thagar, kana mangilas ti ahwyl kon si kuka, vake­ryas i manushwngi turyal: “Kon si kwka ternihar, mandakus mashkara manushwndi, kontu aviskeryas pis kwtka, dyuka phikintsa, sar aslwy, enshukarwsku? Kwka manush zhi akana te na dikyam lis, te prepila khamisti! Mangava me, kana dikhava lis, ti ahwya so phenna piski oda, so mangila, so isi liskw shwrwsti, ama na shi ahwykera mangi liskw mangipin, i kwkwlisku, te sinu mandakus mashkara zhwnin”. Ozaman kana alu pash i Viratisti, u pandavas, dukhwykerimi andw muisti, ama mahadukhusku, vakeryas kide: “ Me sim u Ballavas, manush te kerla habya, of, manu­shwngu gomisarniya! Li man pash tuti – me sim agu kana kerava sosuin”.

U Viratas vakeryas:
6 Me na patsyava, of, te antwysa tut [uchunakiskwya], ta kerzipi hamungi kala sinu torru zanwetsi, soskutu dishisa mangi, ta syan Siyadaekhingu. Pw mahimnasa, shukarimnasa ti murshimnasa, of, chshaviya, tu prepisa ta syan sar enuchumanushwsku mashkara i murshwn kwtka.

U Bhimas vakeryas:
7-8 Of, manushwngu gomisarniya, me sim torru kerzipnihamungu ti hwlwinis. Anglal sourrwsti me zhanava (garazipya) ti kerzera lastimya sosuin, kontu andw anglisarni vakwtsya beneyrulas korkorru Yudishthiras, u thagar. Avryal kwlis, me sim but mahakuvetsingu, asharava man da lachshws, of, thagarwya! Kana asharava man ekh-ekhisku hathintsa ti aslwyntsa, me sa mw anta tuki kama, ti zhanis, of, te syan bibezahwsku!

U Viratas vakeryas:
9-10 Tuki me mw dya kisalu denipi: mw kerws hamuya, sartu vakeryan. Ama me sanwyrum, ta tu syan bendu aver butseki. Tu si shiyzimi ti ovis gomisarnu sastsi phuveti, ekhisa i deryavintsa te sini turyal lati. Ama kanatu kamisa ti kerws, kide ti ovil. Mw ovis en baru kerzernihamungu pash mandi, pash i swi, te kerna pis hamuya. Tu mw agunizis otka sourrw manusha.

U Vayshampayanas vakeryas:
11 Kide, kana thoyas lis andw sweti katutu kernas pis hamuya, u Bhimas olu syas dehimnu manush thagarwski Virata. Ti oda zhivinseylu otka, of, thagarwya, ti na shi punjardi lis kon si oda chachukanis.

Kide rromizila eftaku shoru Il Viratiski i Enbarw [maha] ilistar Mahabharata.

Andral 53-54, 2009

Irizyas S. Savchev

IL I BHISHMASKI

Shoru XIII

U Vayshampayanas vakeryas:

1. Ozaman korkorru oda kana ahwylu sourru anglisarnu,

sourru akana te ovila ti sourru sotu mw ovil anglunis, of Bharata

U buddhikanu Gavalganis, astardu dukha­tar, inkistu andar i maribnasti

2. Ti yakapancha kana dishwyas pis i Dhritarashtraski, sastu andw pisti,

mothwyas liski, ta u Bhishmas, u papus Bharatingu, si mudardu.

U Sanjayas vakeryas:

3. Me Sanjaya sim, of, maharaja! Chokat zhi phuveti tuki, tur-Bharata!

Mudardu si chshov Shantanusku, u Bhishmas, u papus i papungi Bharatingw!

4. Shoru i sourrw kshatriingi, sourrw manushwngi tira te chshena, bishapi,

Akana inkistu opra than tiranindar, pashlu otka si u papus Kauravingi!

5. Chshov torru keryas khelwybi porru ashitsintsa kana dwyandw

i liski enbari raksha,

Ama akutu pashlu si Bhishmas, perkerdu Shikhandinistar, mudardu andw

maribnasti, of, raja,

6. Kuka, kontu si thagar i sourrw thagarwngi, te marna pis

andu kwka maha maribnasti,

Tela i ziswsti Kashi vijwyas manush ekh opra ordonisti, kwka, te tradila  ordon,

7. Kontu u Rama, chshov Jamadagnisku, te na tsiilas kana vijwyas

kana marlas pis ekh-ekhisti lisa,

U Jamadagnis na shi mudaryas, ama u Shikhandinis mudaryas avzis!

8. Sar heroi oda sar u Mahendras si, zoralimnasti prepilas i Himavatuski,

Sar Baru Deryav, oda si andral shantikanu, zoralu sar mursh te inkerla Phuv;

9. Lis, te na shi asharws, tira liskw – sar danda, harru lisku – sar phirradu muy,

talvari lisku (prepila) chshibati,

Ti (kwka) aslwy-manush, papus torru, akana mudardu si panchalindar!

10. I but bari armiya Pandavingi, kaskanwyru liski,

kontu urwyas opra Kurukshetrati,

Lyas ti izdral trashwymnastar, sartu (izdrala) guruvingi charada

kaskanwyru i aslwysti.

11. Kuka i barw kshandriingi mudarnu loyzilas i armiya twrri desh zeswratsya,

Ti kana keryas kwka en bari dukhwymnangi butsi gelu piski – sar Kham.

12. Kuka te chshelas siyada tira, chshorilas lin sartu dela brishind, sartu Shakre,

Kontu andw deshw zeswndi mudaryas her zes desh lindar siyada saldatsin,

13. An kwka akana pashlu si i phuveti sar perkerdu kash, of, Bharata,

Soskutu dyan lis tu doshwy gozi, raja, dinuli kan oda twrrw pheryaswndi!

Kide andi somnwy “Mahabharata”,

andu “Il i Bhishmaski” andu “Il Bhagavadgita”

mothwyas amingi deshutriningu shoru, anovimi

MOTHAZIPI I BHISHMASKU MERIMNASTI

Shoru XIV

1. Sar u Shikhandinis mudaryas mandakus Kauravingu Bhishmas?

Sar u dad morru, lachshu sar Vasave manush, pelu i ordonistar?

2. Vaker mangi, Sanjaya, sar mulu u Bhishmas,

Pwrrw kuvetsisa te syas sar Devel, kontu arakhilas astsyal u dadisti porru

ti loyzilas dinu porru pheryas ti ovil brahmacharya?

3. Kana syas perkerdu u enkuvetsingu, but te zhannas, u mahaharruningu,

mahaozingu, sher-manush, so olu i iluntsa amarw kshatriingi?

4. Kanatu tu vakeryan mangi, ta kuka bar-manush, mandakus Kauravingu,

mandakus-manush si mudardu, enbari dukh thaswyas mu ozi.

5. Ekh syas anglal, aver syas palal, kanatu oda lyas naangli pw armiyasa.

Kon loyzilas lisku dumu, kon syas turyal listi, Sanjaya?

6. Sher (kshatriyas) enlachshu trazimnangu ordonis,

kon i barvali kshatriindar syasas lisa?

Kon phirlas pala lindi, kanatu oda pwrrw manushwntsa daldu syas mashkara dushmwyndi (horr)?

7. Oda, kana ipallas lin, sar kham te ipalla skutsimakus, dushmwyngu

mudarimnangu i dushmwyski armiyatar,

Siyadakiranisku, te na shi asharws, te trashazilas dushmwyskw saldatsin,

8. I maribnasti chshavintsa Pandaviskw keryas oda kuka, ekh te na shi kerwl: Nashalzikeryas sastsi dushmwyski armiya!

9. Tu syanas turya listi, Sanjaya, kanatu oda keryas an kwka,

Sar u Pandavya asharnas pis i Shantaniskw chshavisa?

10. (Liski), zhanimnasa ozizilali dushmwyski armiya,

(dandiyasli) tirin sar danda,

Dhanush [harru] koningu sinu sar trashnu, phirradu muy,

pali u talvari – tezi sar karr?

11. Sher-manush, te na ovilas (ti mwrwl), dharmaku,

kontu nikonistar nanwy vijwymi zhi akana,

kanatu i Kuntiskw chshavi perkerdi, u navijwymnangu maribnindi,

12. U trashnu dhanutazhis [harruzhis] te chshela tira katar u shukar ratha,

shwrw dushmwyngw hwvkerlasli kwlisa?

13. But bari Pandavingi armiya bi ti zaprizil izdralas,

dikhyali sar vazyali pis oda ti marwl pis,

sartu pharws inkerla pis i yag i devaki Kali:

14. Sasti desh zeswratsya oda chshorkerlas dushmwyskw saldatsin,

(kwka) mudarnu manushwngu!

Ti akutu, kanatu bitti pi butsi, gelu piski sar kuda Kham!

15. Chshelas oda tirin sar brishind, mw sanwyrunus, ta asharlas pis i Shakrisa kon agu mw ovil mashkara lindi,

Ti shwl siyada siedis (kshatriin) mudaryas i deshw zeswndi maribnasti.

16. Perkerdu, on pashlu phuveti si, sar enbaru kash, perkerdu tufwyndar;

Soskutu dyas kan i mwrrw doshali gozin ti khwi baht pei opra listi

u kwka Bharatas!

17. Sar syas shiyzimis ti zaprizis i charada saldatsin Pandavingw,

Dikhyali trashnuni, ensahatsingu chshavis Shantanisku, Bhishmas?

18. Dwy syas shiyzimis ti zaprizis u maribi Bhishmasa, Sanjaya?

Dwy syas shiyzimi u Bhishmas ti na mangil ti vijanil

u Dronas kana syas zhivdu,

19. Kanatu (u ternu) unukas Bharadvajisku ti Kripas syanas turya listi,

Sar syas shiyzimi meribi ti rwswl u en lachshu mashkara kshatriindar

Bhishmas?

20. Sar syas shiyzimi Shikhandinis, kuka rajkumari panchalindar,

mudardu andu maribnasti ekhisa

Te na shi vijwynas Devela da u maharathasku Bhishmas?

21. (Lis), kontu pis sanwyrulas ta si dyuzi i mahakuvetsingisa (Ramas)

Korkorru Jamadagniskw chshavis na shi asharwl kuda,

pw bitrashwymnasa te si dyuzi i Shakrisa!

22. Sar si mudardu kuka Bhishmas andu maribi ekh-ekhisa,

te si bendu katar u manipi [jana /zhwni/] maharathingu?

Sanjaya, vaker sourru kwka i murshwsti, soskutu na shi teryava ekhi thanisti.

23. Kon i mwrrw mahatiringw manusha (lis), eternis (enshundu) na olwyas?

Na dyas u Duryodhanas adeshi turya listi ti loyzin lis shundi kshatriin?

24. Sar syas shiyzimi u sourrw Pandavya, Shikhandinisa

en anglal, ti avin but pashw Bhishmasti?

Nanwy sourrw Kauravin oladili syas u eternu (kshariyas), Sanjaya?!

25. Ya ilu morru shudrilu, (rwstu zhi otka) ti ovil barr,

Ti sa dyavas man gozi kana ahwimas so ovila i manushwsa-sher,

u Bhishmas, ti na zaprizil mu ilurru i paseymnastar?

26. Pachiv lisku baru si, zhivzimnangu kuvetsi da, buddhikanipi da;

Naasharimnangu kwka mandakus-Bharata, sar olu kide, ta syas mudardu?

27. Sesi khichnaki pratyancha i lisku dhanushwsti

chshorikeryas ziswsku vayu sar dwnnwypi bulutsistar,

Maha dwnnwypi pratyanchaki lisku dhanushwsti –

en baru, opral dwnnwypnastar bulutsistar.

28. Chshyas oda brishinda-tira karig (zis) Kuntiskw chshavisti,

panchaluya, srinjaluya,

Kana mudarlas dushmwyskw kshatriin i lingw rathingi, pw vajrasa – danavin,

29. Naasharimnangu, sartu mudarimnangu Banas.

Syas enbaru deryav tiranindar ti swy nanwy bundukiin,

Dvip na dikhilas pis, na shi nakhisas, (uchshardu) shaktishalimnangu,

phirimnangu talazisa:

30. Musala, talvarya – (liskw) bohuya, arjanipilakw (grasta),

hatha-jalavarthakw,

phirimnangw saldatsin – charada machshw, (sesi) buriin ti dauin –

uttar roibi deryavisku.

31. Kuka prastanu karig dushmwyn kshatriyas mudarla ekhi chalwymnasa

but grastin, hathin, rathin ti phirrimnangw saldatsin;

32. (Lin) kerla chsharwsti (pwrri) hoimnasa dushmwya dukhwykerla,

Liski hoy si trashnu – sar bohus te zhivindila andw horr pwin

zhala mamuy lindi ti perkerla talazya kshatriin.

33. Kanatu mudarnu dushmwyngu Bhishmas ratisti marlas pis, Sanjaya,

Astsyal anov Duryodhanisti, kon anglal listi syas?

34. Kon loyzyas dayaku pahiya [kololus] i enserbeziski Bhishmas?

Kon, zoralu andw dini pranin, marlas pis i dushmwyskw kshatriin

karig i rig dumya lingw?

35. Kon i anglalni manushwndar te loyzinas Bhishmas,

syas (pash) listi ti inkeri denas (chalwybindi)?

Kon karig i rig dumisti loyzilas pahiya (rathakw) kshatriisti

te marlas pis kshatriintsa?

36. Kon syas pash i baya rigatar, kanatu kuka mudarlas srinjain, Sanjaya?

Kon garwylas zoralisasharimnangu andu anglalnu khizimakus senatar?

37. Kon loyzyas lis katar i rig dumisti, kana lyas u merimnasku drom oda?

Andu maribnasti kon i dushmwyskw kshatriindar mamuy listi syas, Sanjaya?

38. Sar i liskw manushwndar loydi lis, kon agu syas mashkara lindi?

Soski na vijwydi sigu senin Pandavingw, kibortu kwka te syasas nanwy lokis?

39. Soski (prepindu) gomisarnisti i sourrw themingi,

gomisarnu i sourrw zhivdi manushwngi ti hwyvwyngi –

Parameshthinu shiyzimi syas ti khoswn pis u Pandavya, Sanjaya?

40.  Kuliski, telal lisku beshwymnasti, sartu oila andu durg,

mardi pis dushmwyntsa Kauravya,

Bhishmaski, u sher-manush, vakersa tu, ta si mudardu oda, Sanjaya?

41. Andu bitrashwymnasti kwkwli i shaktishalisku manush

mu chshov rodilas  loyzipi

Kudwliski Pandavintsa da na delas pis gozi,

pali (tu antwysa) nevipi, ta si mudardu dushmwyndar, Sanjaya?

42. Na [i]syas vakwtsi kanatu listar, matserdu maribnastar,

rodinas madad u buddhikani (devela),

Kanatu danavintsa odwna marnas pis! Of, kuchw morru dadurrwya!

43. Kanatu kwka maha manush bendzyas pis, Shantanu,

enshundu andw dunnyasti,

(I baht dyas liski) enshukar chshavis, chshyas oda dukh, dukhwypya ti swkletsi.

44. I enshundisku manush, te zhanna Enuchw dromis,

kontu arakhila i dharma pwrri, shuzhw manushws,

I chachukanu punjardisku Vedingi ti lingw kotora,

swy ekhintsa vakersa mangi, ta mudardi kwka manush?

45. (Mudardu) si manush, te punjarlas swy nanwy bundukiin,

shantimi, astardu andw pisti, buddhikanu?

Kana shundzim, ta si mudardu chshov Shantanisku, dim man gozi,

ta si nanwyskerzi amari agorwski asha!

46. Kide sanwyrum: chachuypi asharla bandzipi, ama akana an kuka asharyas,

Pandavya panda mangina u thagaripi, palal mudaribi pakivali gurusti da!

47. Ekh vakwtsi Ramas, chshov Jamadagnisku, te inkerlas maha bundukiin, naasharimnangu,

Ashardu syas u Bishmas ekh-ekhisa maribnasti andu maribi kurdu Ambatar.

48. I enuchwsku i sourrw harrundar,

kukwliski, kontu i sourrw pwrrw kerzimnantsa prepindu pis Indraski,

Astsyal meribi Bhishmasti tu mangi antwysa nevipi, kontu si kide kerkikanu?

49. Lis na shi nashwykeryas kuka da, kontu mudarlas sasti senin kshatriin,

Kuka kshatriyas, Jamadagniskw chshavis, dushmwyskw kshatriin te mudarla!

50. Na syas mudardu (ozaman) u butigozeverwsku,

mudardu syas akana Shikhandinistar.

Gelu piski kwka mahamanush jinsistar Bhrigu, te matserlas pis maribnastar,

51. Enlachshw adetsisa, murshikanipisa, kuvetsisa ashardu Shikhandinistar, chshov bendu Drupadatar,

Kuka, kontu u manush, te punjarlas swy nanwy bundukiin,

u kshatriyas, shundu andw maribindi,

52. Pelu kwka, te punjarlas en lachshws u bundukiin,

u mahamurshwsku mandakus-Bharata!

Kon i barwmurshwndar syasas turya kukwli saldatsis, te mudarlas dushmwyn kana lyasas lin mamuy?

53. Vaker mangi sar phaseylu maribi mashkara Bhishmas ti Pandavya?

Palal liskw merimnasti phivzi oi mw chshaviski sena, Sanjaya;

54. Sartu charada gurvi bi kuka, te phirla angla lati dukhala i sena mwrri.

Palal i merimnasti andw mahamaribisti kwkwliski,

kontu pw murshikanipisa syas opral sourrwdar i themisti?

55. Kon patsyalas liski, so olutar ozaman tumarw iluntsa?

Ti akana sar mw ahwykeras amaru zhivotus, Sanjaya,

56. Sar kide olu, ta mulu mahakshatriyas, u dad,

u enbaru andw chachukani dromisti?!

Sar dikhila uzharzimnangu manush aver jahazi, kana lela dibi andw horr pweti,

57. Kide chshavi (mwrrw) andw dukha pharws dukhana i mudardi Bhishmasti!

Ya pali mu ilu barr olu, Sanjaya?

58. Dwy na patladw kana ahwylu, ta si mudardu u Bhishmas,

kwka sher-manush!

Kuvetsi lisku sar saldatsi, kuvetsi lisku duhkhusku ti zhivzimnangu buddhi

i kwli mandakus-manush

59. Na syas shiyzimi ti ahwys kibor syasas, na syas shiyzimi ti asharws lis!

Kide da na ahwimtar sar mudardu syas?

(Arjanimnangu si), ta ne bundukiya, ne murshikanipi, ne buddhikanipi,

ne u drom phirrimnangu i zhivzimnangu kuvetsi,

60. Ne zoralipi da, ne pali kana chshesa sourrws turya tuti si shiyzimi ti loyzin tut i merimnastar.

Ti zhanis i Kala – i en uchu kuvetsi,

kontu si nanwyasharzimnu nikonistar andw dunnyasti,

61. Dwy i merimnasti i chshov Shantanisku, u Bhishmas, tu zieskersa,

of, Sanjaya!

Thardu dukhatar i chshaviski, me dizimi sim gozeti astsyal mahadukhaki,

62. Loyzimnasti uchu i Bhishmasti, chshov Shantanisku, asha isyas man!

Kanatu u Duryudhanas dikhyas u Shantanisku chshov,

te syas sar Kham, perkerdu phuveti,

63. Ozaman kastar ti rodil loyzipi mu chshov, of, Sanjaya?

Kana dyavas man gozi i mwrrw manushwngi ya i dushmwyngi,

na patsyava, ta khek veki mw alakhil pis ti kerwl kwlis, Sanjaya,

64. Na dikhava swytu ti ovil shiyzipi ti loyzil pis u loyzimnangu phuveti,

trashna si i dharma kshatriyasti, kontu i rishin arjaniskerna amingi,

65. Kana mudarna chshov Shantanisku, thagaripi mw achshwl Pandavingi.

Amin da kana na shiyzyam ti loyzas lis, kwlisa amin da mangasa thagaripi!

66. Ti zhanil pis, achshipi andi dharma i kshatriingu,

mwrrw chshavingi ti Prithiskw chshavingi, bezah ne lingi, ne averwngi!

Kide mangseyla pis ti kerwn u ariin kana kikidila lin u zhivotus, Sanjaya:

67. Barwozisa ti agorwkuvetsisa odwna mangseyla pis ti len u khwypi

mamuy pisti.

Manush rwsisa andw pisti, te na shi asharws lis,

kontu mangilas ti nashwykerwl (dushmwyskw saldatsin),

68. Chshov Shantanisku, sar dushmwya syas shiyzimi ti perkerwn u Pandavya?

Kati syas beshwykerdi senin? (Kwkwli) mahatma manushwntsa sar maryas pis u Bhishmas?

69. Sar u dad morru, u Bhishmas, mudardi dushmwya, vaker tu, Sanjaya!

Sotu vakerdi Duryodhanis, Karnas, Shakunis, Subalakw chshavis,

70. Kwka da (khelwymnangu-mentarazhis) u Duhshasanis,

kana syas perkerdu u Bhishmas?

I kshetrati, uchshardu maswntsa kshatriindi, grastindi ti hathindi,

71. Bhalintsa, tirintsa, en barw talvarintsa, bhalintsa te chshena pis, chshurintsa, trashna kulharintsa,

Andw kwna maribindi bigozingw, biparvarzimnangw,

72. Andi chsharwsti i khelwypi zhivotusti ekh vijwyas,

pali kontu nashwyas i kwlindar mandakuya-manusha?

Kon vijwyas otka, kon avryal kwlis te mothasa lis syas perkerdu?

73. Averwngi, bi Bhishmasa, chshov Shantanisku, lingi rromizi mangi Sanjaya!

Mangi nanwy shanti kwli zeswstar, kanatu ahwim ta u shuzhu si mudardu,

74. Dad, te trashazilas kerzipnintsa pwrrw, u Bhishmas, u lachshipi marimnasti!

Dukh astaryas ilu morru, barila odiya kana dyava mangi gozi,

ta chshavi mwrrw mw ovin perkerdi,

75. Tati tsilisa parvarsa tu morru thardu alwybi, Sanjaya!

Of, chachuypi si, ta dukhana mw chshavi, kana dikhli perkerzipi Bhishmasku,

76. Shundzikerdu i sourrw themindi,

thoyali pw pikindi u baru pharipi praningu!

Shundzimtar me swy nanwy khwypya, te kerzyas Duryodhanis!

77. Ti kide, rromizi i sourrwski, Sanjaya, sotu otka phaseylu

Ti kuliski sotu olu i maribnasti!

78. Sar oda ozizilas maribi – lachshws ya khwynis, – vaker tu, Sanjaya,

Ti so shiyzyas ti kerwl u Bhishmas, te mangilas u vijwypi?

79. Rromisker ekh pala avrwsti, pherdis, bigarazimnasa sotu ti ovil,

Sar nakhila maribi mashkara senindi Kauravingw ti Pandavingw,

80. Sar ti swy vakwtsisti otka so otka olutar.

Kide andi somnwy “Mahabharata”,

andu “Il i Bhishmaski” andu “Il Bhagavadgita”

mothwyas amingi deshushtarwngu shoru, anovimi

PUCHIBI DHRITARASHTRASKU

 Irizyas S. Savchev

VACHANIS

Basavanna

8.

Dikh, u themi, kerilu

tufwystar deryav, sar chshela pis mamuy manushwsti.

Soski vadila pis karig mw ilisti da?

Of, vaker

soski zhi mw hulati avila?

Gomisarniya,

sar ti kera tuki pheryas,

kanatu uchsharla veki mu shoru?

Gomisarniya, gomisarniya,

shun u sesi morru.

Of, Gomisarniya i ekhiskerdi lenin,

shun man.

9.

Zes pala zeswsti opra pisti

thovavas ekh opra avrwsti

gunis arjanistar.

Hwyas man

dunnyas – u baru sap,

u Rahus – te hala sourru.

Mw masa

sini skutsimya avzis.

Ama oshtazipi kana mw ovil

of, Gomisarniya i lenindi te ekhiskerna pis?

21.

Dade, andw nazhanimnasti Tu trazyan man tusa ti nakha

andar perra dwekw,

andar swy nanwy themin.

Dwy syas bezah, ta me benseyavas,

of, Gomisarniya?

Dwyalu karig mandi ov,

nanwy ekh drom te benseimas.

Pheryas dyava tuki,

Gomisarniya i lenindi te ekhiskerna pis,

ti na bena man veki nikana.

36.

Eyya zhukela

prastadili [dehetti] pala shoshwysti,

u hanjwhoya maswskw

gyuryultiya kerna:

“De!

De!”

“De! De!” –

gyuryultiya vadina

u hanjwhoya andw gozeti.

Dwy mw rwswl Tut mu ilu,

Gomisarniya i lenindi te ekhiskerna pis,

anglal u indriya-zhukela

ti rwswn lis ti ti thasazin lis?

52.

Sartu gurvi, dalzili i batatsisti,

shoru bandzyava me da karig-kurig.

Nanwu kon ti rodil man,

ne ti alakhil man,

zhi kanatu u Gomisarnu morru na dikhil kwka hwyvwytsi

ti shingindar ti na inkalil lis.

59.

Mw changa phag, Dade,

ti na phira kwtka ti kutka.

Li mw yakha, Dade,

ti na dikha karig kwlis ti kulis.

Ker man kashuku, Dade,

ti na shuna nikachshi aver.

Mangava sade

twrrw papalni kwzwya

ti ovin mangi diretsi,

of, Gomisarniya i ekhiskerdi lenin.

62.

Ma tradi man sastu zes ti shuna:

“Kasku, kasku, kasku si kwka”?

Mangava ti shuna: „Morru, morru,

morru kwka si”.

Of, Gomisarniya i ekhiskerdi lenin,

tradi man ti indriyskera man chshov

kwli kherwsti”.

64.

Shiva, na Syan dwyalu.

Shiva, nanwy Tut ilu.

Soski keryan kide, ta ti bena man

bibahtalu i kwkwli themisti,

ipaldu averwstar?

Vaker mangi, Gomisarniya,

dwy nanwy tut panda ekh

tsikurru vidwy ya luluzi

bendzikerdi sade astsyal mangi?

132.

Mw tradis lin pheryas ti kerwn

ti dandiyas lin

sap.

Mw tradis lin pheryas ti kerwn

ti pwrwl hwnietsi chwlhwy

opra lindi.

Ama lintsa na ma inkis shwrwsti –

lalurrilili barvwypnastar.

Ama ti dikhisa lin angla

Chovrrimnasti draba te kerla,

birdem mw len ti kerwn pheryas,

of, Gomisarniya i ekhiskerdi lenin.

144.

U sap te bandzila

si tamam dyuzi i sapiskw hwveti.

I len, te bandzila,

si tamam dyuzi i deryaviski.

Manusha, te bandzina, te sini patserdi pw gomisarniski

si tamam dyuzya

Liski!

212.

Ma astar tut

i bhakhtisa.

Chshinna sar jaga

kana tsidila

ti kanatu irizila

pali chshinna.

Ti thois vas torru

andu akhurru sapisa andrw

dwy na ma ovil tuki nikachshi?

468.

Phyava u pwy, konisa nwerasa changa Twrrw

hava u hamus, kontu dyasa lis Tuki

ti vakerava mangi: Twrri si, sourru torru si –

iduya, zhivotus, rwzi.

Gomisarnu morru si sar hwriy,

te lela u agorw prushuka da te dena laki u manusha

ti na mangila pheryasa,

astali mangila –

kwka si Gomisarnu morru i lenin te ekhiskerna pis.

555.

Devela gazhkani

sa loyzina

angla manushwngw darwndi.

Ti vakerws lingi „Zhan tumingi”

khek lindar na zhana piski.

Avera pali sini hwnietsya sar zhukli.

So mw den tuki

kisali devela,

te zhivindzina denipindar manushwngw,

of, Gomisarniya i lenin te ekhiskerna pis?

563.

Hlemeka Devel si.

Barr i dromisti si Devel.

Devel si i kangiy.

I pratyancha si Devel

U bakwri si Devel,

akhorru da si Devel.

Devela, devela, kidibor but oli,

ta nanwy kati ti oshtikerws.

Sade ekh Devel isi. Amaru Gomisarnu

i lenin te ekhiskerna pis.

586.

Andw brahmwyskw kherwsti

katutu parvarna i yag

santsan devel si,

kanatu i yag barila

ti thabila u kher,

chshena opra listi

pwy lenatar

ti chshar dromistar,

andw dukhindi marna pu gyuysi

ti rivizina i charadati.

Bisterna pu adar kwli manusha

ti dena pis i pwrrw yagasa

of, Gomisarniya i lenin te ekhiskerna pis!

820.

U barvali

mw kerwn mandirya i Shivaski.

Pali me,

u chovrru,

so ti kera?

Mw changa sini diretsya,

mw masa – somnalnu than i khangireti,

mu shoru –

somnalnu gumbat.

Shun, of, Gomisarniya i lenin te ekhiskerna pis:

kuka te vadila pis mw pwrwl,

kuka te phirla mw achshwl eternis. 

 

Devara Dasimaya

23.

Andw perr dweku

u kwzwy na punjarla

laku muy,

ne pali odiya

lisku.

Andi maya i kwli dunnyasti

manush na punjarla Gomisarnis,

ne pali lis u Gomisarnu punjarla,

Ramanatha.

26.

Yag

andu her kerzeripi, dikhipi ti pheryas.

Mashkar mursh ti zhuvel –

yag.

Andi strakina hamusa

nigaldu palal vakerdu „na kamava” –

yag.

Andu nashalzipi i kulisa te si linu –

yag.

Ti andu kovrrimnasti i ekhipnastar –

yag.

Dyan amingi

panch yaga

ti chik andw mosti,

of, Ramanatha.

44.

Soski si mangi

chshuri ti inkera mw vastindi,

of, Gomisarniya?

Sostar ti inkala lis,

so ti bhokna,

kanatu Tu syan u dunnyas sastu,

of, Ramanatha?

80.

I chik si denipi Tutar,

syamus te inkila – Tutar denipi,

Balval te phudila – Tutar denipi.

Sar ti anoviza kuli zhukela,

te hana Tw vastistar,

pali zieskerna her aver?

120.

U masa inkerava me,

u solutsi Tu inkersa.

Tu zhansa u garazipya mwrrw maswsti,

zhanava me u garazipya Twrrw solutsisti.

Kudwliski u mas Torru

si andw mandi.

Tu zhansa

ti me zhanava, Ramanatha,

miriklu

twrrw solutsisti

andu mas morru.

121.

Devliya i mwrrw jinsisti,

mw pwrrw mw oshtikerwn sade otka,

katutu pwrrw Twrrw

anglal te olili:

man nanwy mwrrw pwrrw.

Dwy si shiyzimi u getvereya

kwkwli themistar ti zhanin

u miriklis, u ekhipi

Twrrw pwrrwndi

ti mwrrw,

Ramanatha?

123.

Kana syan maswsa –

mw bokhwys.

Kana syan maswsa –

mw hohwys.

Of, Tu, ma asa mantsa,

ma ker man chik pali,

ta mas isi man:

komi ekh drom dal andw maswsti

ti dikhis

sar si,

Ramanatha.

133.

Kana dikhina

barw bala ti chucha ti barin,

vakerna: zhuvel si.

Kana dikhina chshora

vakerna: mursh sinu.

Ama dikh – ozi, te urala

mashkara lindi,

Ne mursh si,

ne zhuvel,

Of. Ramanatha.

144.

Bas ti chshinis

dondi

ti telunu agor ti kerws zhuvel,

u oprunu – mursh;

mor lin ekh-averwsti,

zhi kanatu alwyn:

ha, akana vaker

i nevi yag bendzi

dwy si murshikwy, ya pali zhuvikwy,

of, Ramanatha? 

 

Mahadeviakka

2.

Sartu

manzin, garazi phuveti,

lastipi i benimnasti,

somnal i barrwsti,

tssil andw syamusti

u Sa-ekh si katimwya horr

andw ilisti.

Bizhandi sini

u droma amarw Gomisarnisti

parnu sar yasmiy.

11.

Sar thuth

andw pwisti syan tu: na shi vakerava

kon si anglal,

kon pala kwlis;

kon si gomisarnu,

das kon si;

kon si baru,

kon tsikurru.

Of, Gomisarniya parnu sar yasmiy,

tsira ti si, ti dehila Tut

ti zieskerla Tut oda,

dwy na ma aviskerwl piski oda

rakshaswsku kuvetsi?

18.

Nanwy karig ekh ti duy, karig trin ya shtar,

ami karig ohtodeshvar ti shtar guna shwl ti guna siyada minja

wimasli;

karig sa-ekh themin

wimasli,

parvarzi

dukhatar ti hanjatar.

Swytu ti ovinasli

mw anglalni bendzipya,

ov karig mandi dwyalu

andu kwka ekhurru zeswsti,

of, Gomisarniya

parnu sar yasmiy.

50.

Kanatu man na punjaravas,

kati syanas Tu?

Sar varna somnalisti

andw mandi syanas Tu.

Tuti dikhim,

Gomisarniya parnu sar yasmiysti,

miriklu i Torru „kwtka sim”

andw mandi

sastu.

 65.

Ti uran pasiya

mw sanwyru ta sini parvardi trushwypi morru ti barvwypi morru.

Ti pwrwn syunda,

mw sanwyru, ta pwrla pwy opra mandi ti nwera man.

Ti tradil u bwiri opra mandi,

mw sanwyru, ta si luluzi astsyal mw balingi:

Of, Gomisarniya parnu sar yasmiy,

ti pwrwl shoru morru mw kakindar,

mw sanwuru ta si denipi Tuki astsyal.

69.

Of, dwe, tharavas

yagati bi alwymnasa;

of, dwe, dukhavas

yaratar bi ratisa;

chshimas man, dwe

bigudimnasa:

dehimnasa karig

u Gomisarnu morru, parnu sar yasmiy,

pirrimas karig swy nanwy themindi.

75.

Syan u vesh Tu,

syan Tu sourrw vidwya shwlwbreshwngw

andw veshtisti,

syan Tu chiriklu ti hwyvwy divichimi

te khelna mashkara vidwin

ti avryal lin.

Of, Gomisarniya parnu sar yasmiy

te phersa ti pherdu sourrwsa,

soski na dishwysa mangi

u muy Torru?

79.

Tuki dukhava

i sasti shtar kotora i zeswsti.

Dii sim

i sasti shtarw kotora i ratseti

Pashi sim nashalzi,

bilazi Tuki zes ti rat,

of, Gomisarniya parnu sar yasmiy.

Sartu phoswyan tu dehibi

bisterimtar indra

bisterimtar bokhwypi ti trush.

88.

Tsindzyas Oda mu ilu,

chshorikeryas mw masa, lyas sar denipi

mw gudipya,

choryan sourru morru

zhi agor.

Me sim i phirremi

i mwrrw Gomisarnisti, parnu sar yasmiy.

104.

Zhi kanatu na aviskerws tuki

zhanipi i lachshwski ti khwyniski,

sourru si

mas i hanjaki,

kher hoimnasti,

prangis i barwhulaki,

kher hanjaki,

taraba i garvasiymnasti,

hohandu muy i kaskanimnasti.

Ti na zhanis ti na nashalzis u zhanipi kwliski

na ma punjarws

Gomisarnis parnu sar yasmiy.

114.

Rrom andral,

phirryamlu avryal –

na shi zhivindzava donintsa.

Themi kwka

ti kuka aver –

na shi zhivindzava donintsa.

Of, Gomisarniya parnu sar yasmiy,

na shi astarava ekhi vastisa

baru akhor da

ti harru longu.

317.

Beshtuli opra veshtisku nilwysku sapfiri

chshurmuthiskw barrwntsa sar pantofya,

phuzyali longi shinga,

of, Shiva

kana mw dya Tut angwy

mashkara mw chuchindi?

Of, Gomisarniya parnu sar yasmiy,

kana mw trada pala Tuti,

bi ti lazha mw maswndar,

bi ti lazha mw kamatar?

323.

Karig u drom dikhava –

kana mw avil piski.

Oda ti na avil

hepten mw bilwya ti hepten mw nashalzya.

Of, dwe, ti sinu dur mandar,

rat da ti ovil,

mw ova sar dehimnangu chiriklu

chuchw angwintsa.

Allama Prabhu

213.

Sastsi khangirisa [mandirisa]

andu kwka maswsti,

soski si tuki aver?

Nikon duy na mangila.

Of, Gomisarniya i barrwskw hwvindi [gufindi]

ti syan barr Tu,

me so sim?

459.

Dunnyas tssiila kana sanwyru,

ta parhuzyasli sourrw uchshala.

Dwy si shiyzimis uchshala

u donipwrrwngw manushwn ti mwrwn?

Ti hahwys diynu khwtar

opral chora manushws i perdalnu kinara,

dwy oda mulu mw pwrwl?

Kwna manusha na zhanna

garwypi,

phoswybi indriymnasku;

dwy amaru Gomisarnu gufindi

mw zhivinskerwl pis,

soskutu odwna mangina kwlis?

 537.

Ziswskw yaga aladi veshtis,

veshtiskw yaga aladi u zis.

Shun, shun alwybya

i shtarw rigindi.

Khelna bangis, hemen-hemen dikhina pis mashkara lindi

siyada masa kheimnasa,

mwrna bigendi droma.

Of, Gomisarniya i gufindi.

629.

Ekh mwrla,

aver igala lis te morya,

zhi kanatu u triinu na lela lin i don

ti na tharla lin.

Nikon na zhanna kon dulha si [rrom te piltseyla],

ne pali borrorri.

Meribi

pelu opra bevisti.

Anglal luluzya ti bangin

u piltseymnangu syas mulu.

Gomisarniya, sade manusha Twrrw, te phirna pala Tuti

meribi na zhanna.

668.

Balval astaryas lis indra

zabanas liski syundiskw ziya indriymnangw [soimnaskw].

I loka soila

ti biagorwsku duralipi

dela liski chuchi

thuth ti pel.

Syunda potwyzina.

I ziy soimnaski bitti.

U Gomisarnu si,

santsan nanwy lis.

809.

Khek vakerna,

ta dikhlili Lis.

So si Oda –

kham opra amindi,

phirribi chwlhwindi?

Gomisarnu i gufingi

zhivindzila andw ziswsti

i chshurmuthiskw veshtisti.

959.

Parvar i chovrrwn,

vaker u chachuypi,

khidi pwy

i trushali manushwngi,

vadi shternis andw ziswsti –

shiyzimis kide mw zhas andi svarga

kana mwrsa,

ama kide da mw ovis dur

i Gomisarniskw chachuymnastar.

Pali kuliski, kontu punjarla Gomisarnis,

fwydas nanwy.

Irizyas S. Savchev

Tsvetan Shtiliyanov

Po pwtya kwm men

Dromis karig mandi

* * *

Dehava tumin
nanwy soskutu mangava.
Dehava tumin
soskutu shiyzava! [shiyziskerava]

* * *

Kibor
ti dya tuki?
Ti pali
ti deha tut?

* * *
U triinisku loyzyas
i somnwy
phabwy!
Genava!
Dwy me sim
u duisku?

* * *

Ma khos man!
Mw phaga man.
Zhanava.
Mw khidis man
sastu.
Mw khidis man.
Patsya!
Na ma ova kontu simas.
Agu dromisti.
Ti palalnu dromis.
Na ma
deha tut.

CHOR

Chordi mangi sourru – u kher,
dehibi, mu Devel chordi.
Chordi mangi anov morru, mu rat, u pwy…
Kwka na rwstu lingi – na zapriditar ti chorwn.
Chordi mangi mu efiri, i phuv mwrri chordi –
marru morru, mw tsigarya, mu kaves!
(Mashkara amandi ti vakeras – panda chorna!)
Chordi mangi mw kirmidis,
mw kirpichya da chordi.
U momiya chordi.
U tryanda rupiya da.
(Panda chorna!)
So chordi mangi panda?
Mu swrzipi. Sesi morru.
Sourru murrwymnaski, u kafrya ti u kash.
I soba ti i teslas.
Mi butsi chordi.
I mol, i halvas.
Ti so nanwy!
Chordi!
(Panda chorna!)
Kwka patrin da mw chorwn.
Ti i himikalka.
Hramusarava ti asava.
A punjar soski!
Ama nanwy zhi trin droma…
Chordi i en barw chorwstar –
mandar!
Soski si u en baru?
Chorava mandar. Kwka si!
Chrdi i patrin opra konisti hramusarava.
Ti u zes da. I himikalka da.

* * *

Pherimtar
u sastu kher
iduintsa
swrzipintsa
talvarintsa
kalendarintsa
ilintsa.

Pherimtar
u sastu kher
manushwntsa.
Ti sa
mangila pis mangi
aha –
ti avil panda
khek!

* * *

Anglal bresha – tsiynu
ya pali ti vakeras lis dyuzi
matu
keravas sourru
ti roykera tut.
Akana – tsiynu
ya pali ti vakeras lis dyuzi
matu
phirava mashkara
swrzipindi
ti kerava sourru
me ti na roykera man.

* * *

Tsami, andw kontu
benseyla
i trash
ti merava.
Thiminkurrya avzis
ti kidibor tasya.
Tsami, andw kontu
andw mw vastisti
zorwypi
khidava.
Sa puchava
zhi kana mw
mera?
Thiminkurrya avzis
ti kidibor tasya.
Tsami, andw kontu karig
u lachshw pheryaswndi drom
alakhava.
Sa puchava.
Mw mera zhi kana!
Thiminkurrya tasya
ti kidibor avzis.

* * *

Tharava tsigari
ti i yag
loyzava!
Ti tatsera man…
Lyava dibi!
Andw breshwndi
dibi lyava…
– Purwe, di man
yagurri!
– Ava pash mandi!
Zhava karig lati – mi purwy nanwy la.
I purwy si dur.
Rozim la pash
u rakshadis.
Puchimtar laki –
odwna na
shunnas man.
Oshtikeravas
lingw barw angushta
ti rivizavas diimnastar.
I purwy, i purwy
kati si?!
Pali u ruv
asalas!
Pali u ruv
prepilas
mandi.
Purwe, kati syan?
I yag
kati si?
Ti u tatsipi!
Eya
bresha
rozim
tut.
I richiyasa
ti i machshwsa
ovimtar
amal.
Eya
marrw
hwimtar!
Ti eya
bresha
nandzi ozisa
rozimas
tut!
– Purwe, di man
yagurri!
– Ava pash mandi!
– Pash tuti sim, purwe,
zhi i ikonati,
konatar
dikhisa
man.
Dikhisa
ti tatsersa.
– Purwe, di man yagurri!

* * *

U agornu
pheryas
hava!
U agornu
dehibi!
U kham agornu!
U agornu zes!
Achshilu
u agornu
kotor.
Oda mw
ovil
mangi
u agu da.

* * *

Kotor
marru
mw has
mashkara ratseti.
Kotor marru –
i ushtingw
thanisti.
Ti loyzas
u ushta
sasti –
astsyal i aswymnaski.

* * *

Nevis
potwyzava.
Trashnu
ti longis.
Nanwy
so ti
vakera
tuki.
Trashnu
ti longis
nanwy so
ti dya tuki.
Nanwy
so
ti manga.
Ti
manga
i breshwndar
te
nakhisti.
I breshwndar
kontu avina.
Pali potwyzava!
Marrwsti
prepyava?
Marru,
kontu nanwy
kon ti kerwl kotorwndi.

* * *

Pala
mandi
mukava
sade
umblala.
Shilali
ti siletsiskw.
Pala mandi
mukava
pheryasa.
Chuchw
ti
kali.
Kali
sar
kaskanipi.
Pala
mandi
na mukava
nikanjurru!
Ti agorws
tw ekhingu
kalu umblal.
Mw kerwl man
chshar!
Ti en agorws
ma zha
chendzimnasti.
Chendzimnasti
mangi.

* * *

Soski si mangi
chachuypi
kontu
chorimtar?
Mangava morru…
U kerkikanu…
U ipaldu.
U chachuypi
te mwrla!
Morru
mangava…
U potwydu andw mandi.
U dizimi pala listi.
U agornu
chachuypi.
Chorava!
Ama nanwy
gazhkanu
chachuypi.

* * *

Tsidava
palal kwna
oshtikeripindi.
I zeswsti.
I shilwymnasti.
Ti dya mu borchi tuki
ekhi rupiyasa.
irizimnasti
lyava mangi
u oshtikeripin
(kuka),
u zes (kuka),
shil – kuka.
Bisterim
ti
vakera
tuki.
Odwna da sini
somnalni –
sar i rupiy
konasa
shuzharim mu borchi.

* * *

Pala
mandi
mukava
prushuka.
Ti na
nashalas amin
kana irizasa!
Bisterimli
i paramiswski
ti i chiriklingw andw lati –
patsyavas.
Rodavas
drom!
Drom
mw
phralingi!
Nashwim man!
Nashwim
u drom.
Drom
ti phrala mwrrw.
Akana
sim sar halumi
mashkara
lindi
ti rodava.
Rodava u paramisi,
andw kontu
pali mukava
prushuka.

* * *

Tsikwrrwskerava
man!
I kyututsisti
te si avri
prepyava.
Opra listi
u papus
chshingerlasli
kash.
Ti tatserwl
u chovru
zes,
u chovru
kher.
I purwy
ti dad morru.
Tsikwrrwskerava
man!
Sar
u zes.
sar
u kher.
Sar i purwy.
Sar u papus.
Ovava tsikurru –
sar khurmisku
kutsi!
U bresha
chshingernas
kashta
opra
mandi.
Lintsa
tatserim
sourrw.
U manusha da,
kontu
dehava.

* * *

Sastsi rat
u Devel runu
mwrrw
asuintsa.
Roykeryas
pw yakha
astsyal i manushwngi.
I dukhaki,
i amarw ashwngi.
Mukyas
asuya
mwrrw –
lintsa rovava sade
Me.
Rovava
zorwymnastar…

* * *

Savchuski

Ti rovin
twrrw
phikisti.
Ti rovin.
Tu rova,
di tut angwy
ti rova
twrrw
phikisti.

* * *

Pali i Savchuski

Dikh tut.
Tut
mw dikhis.
Mw dikhis
sourru,
kontu shiyzisa
ti kerws.
Ma vaker nikachshi.
Sar mandi.
Ti me shiyzava ti
ti na deha tut.
Tu da ti na
dehis tut.
Kwka tu shiyzisa lis.
Man da sika.
P.H.
Bister u pheryasa.
Me chorim lin.

* * *

Mw dadiskw swrzipnasti

Phirimtar
mu zhivotus
nangu.
Nangi sanwyripintsa
ti nangi
vastintsa.
Phirradi ekhintsa,
kidibor phirradi
ekhintsa –
sanwyrum
nangi.
U swrzipya
sar dierdi prastanas,
rodinas tsavaluya –
ti na ovin swrzipya,
ti na ovin nangi.
Ti mu ilu – pharadu,
mangila ya nanwy –
potwyzila.
Ti kerla piski butsi –
nangu sigur.
Phirimtar
mu zhivotus
nangu.
Pharwimli sourru morru.
Amalipya
tahtwysa.
Phireybya andw thanisti.
Pharwimli
zhi “nanwy”
porru bisunimnasti.
Mukimli lis nangu
bi uchsharimnasa
bi astalintsa
bi swytu ti oil tatsipnasa.
Chshyali
kwtka-kutka
asha ti pheryasa,
nangi pheryasa
ti nangi
asha.
Nangi!
So
achshilu mangi?
Ti nashala
ekh aswypi.
Mw vastingw
mwzolis.
Ti muka man
nangu!
Nangu sar chachuypi!
Chovru sar paramisi!

* * *

Mw khida
sourrw
barra.
Sourrw
barra
dromindar
mwrrw.
Mw vada
soba
kher
cheshmes.
Mw muka
sade
trin.
U ekh
mw phira
andw mw ozisti.
Andw mw ekhisti –
u donisku.
I triinisku –
listi mw hramusara
mu agu
stihus:
“… nanwy u vakerdu si
kerdu,
ami u kerdu
si vakerdu”!
Mw khida
sourrw
barra…

* * *

Nanwy tuki!

Mw
lyas amin
mamuy
pali
i dromisti
karig
tuti.
Mw lyas
amin mamuy
i dromisti
karig mandi.
Ti Devel
prarthana kerava,
kerkikanis
kerava prarthana
ti ovis
sa i rrumi
kontu punjarava.
Tu ekhintsa
kwka themi
na punjaryanli.
Me ekhintsa –
tuki
kourriili.
Andw mw vastisti
yag alwimtar
ti tatsera tut
ti tatsera tut.
Man ti
tharwyl.
Tut
ti dukhal!
Mw lyas amin mamuy
pali
i dromisti
karig mandi.
Mw lyas amin mamuy
pali
i dromisti
karig tuti.
Ti Devel
prarthana kerava,
kerkikanis
kerava prarthana
ti ovas
sa u manusha
te punjarasa amin!
Tu ekhintsa
u themi morru
na punjaryali.
Me ekhintsa
tuki kourriimli.
Andw mw vastisti
yag alwimtar
i yag – mu ozi.
Mw lyas amin mamuy
pali
i dromisti
karig amindi.
Ti Devel
prarthana kerava,
kerkikanis
kerava prarthana
ti ova
sa u manush te punjarsa,
ti ova
sa u manush te punjarava.

* * *

Thoim
mw vasta –
ti puchava
sar kwli vastintsa
stihus
ti hramusara?

* * *

Hich
na shi
ti hoha.
Lokis si mangi
ti vakera u chachuypi.
Achshiimtar
bi
amalintsa.

* * *

I Ivanaki

Mang mandar
akana.
Akana
kanatu
nanwy man
nikachshi.
Akana mang
mandar!
Pali me
teriluli
mashkara
kwka, sotu
isi man
ti kuka,
te
nanwy man,
ya pali
te dim lis dumu,
i don da
dyava!
Akana
mang mandar!
Ekh dondar!
U triningu,
u triinu
nanwy kuchu.
Ma di liski
kidibor da.

* * *

Lingi
kandzimnasa

Na dehinas man
mwrrw
anglisarni rrumya
ti gazhya.
Lingw
phrala da
na dehinas man.
Lingw
dada da.
Of,
na zhanava dwy isyas
manush te dehil man.
Ozizavas
lingw phein
ti kwzwyn – simas
lingu rrom ti mursh.
Ti na
bistera –
mursh.
Mudardu,
ipaldu
zhavas mangi khwrw –
barrwsti sutuli –
sar mursh.
Khwrw
pala
but zhuvela
ti hoha.
Mwrrw ti lingw.
Mu dad vakerlas:
– Chshovrrwya,
pala her zhuvel achshwna
swrzipya.
Lingi – twrrw
kwzwyn!

* * *

Mw yakha
mangisa?
Mw pheryasa,
mu vas?
Mangisa!
Mw dya tut mw yakha –
tut na ma punjarws
andw lindi.
Mw dya tut
mw pheryasa.
Lintsa sar
mw hramusarws stihus?
Mw dya tut
vas morru-
nanwy
torru vas
mw chumidin
kshamaski.
Ti sar mursh
ti dharmasws –
ti dya tut
morru
shiyzipi!
Me mw dya,
ama
na mangava
torru
barvwypi!
Zha tuki!
Mangseyla pis ti zhas tuki.
Puchwsa soski?
Na mangava
ti oil man
sourru!

* * *

Trazim
ti roda
mw phrala.
U shtar
– sar themiskw riga.
Prasavas
pis
mu dad
ti Devlis.
Chshorikerdi
phrala
dad
ti Devlis.
U Devel dikhalas
opral
ti uzharlas
mw dosha.
Khek keryas bezah!
Kon syas?
Me, dad,
phrala, Devel!
Sar ti zhana?
Ti puchava – dwy na syamas
panch?
Kidibor
angushchya
sini
mw vastisti –
ekh
lindar
bi anovisa.
Sar mandi
… trazim ti roda …
Bi dadisa
bi phralintsa
bi Develisa.
Devliya,
kidibor
sim chovrru!
Na shi khizimtar
mw phralin.
Achshiimtar
bianovisku.
Dukhala man,
Devliya,
ti rovava!
Murshikani asuintsa, Devliya.
Zorwymnastar.
Nanwy dad,
nanwy phrala,
nanwy u Devel da.
Arman opra mandi,
Devla.

* * *

Tu!
U agornu
manush
konistar
mw manga.
Soski?
Isi tut!

* * *

En but
nanwy man
kwtka
kana
dyava man gozi
astsyal
mangi!

* * *

Mwrrw kwzwyngi

Tsikwrrwskerava man
sar
u kyututsi
i dorusti.
Opra konisti
u papus
chshingerlali
kash.
Ti tatserwl
u shilalu zes
i purwy ti dad morru.
Tsikwrrwskerava man
sar
u kyututsi
i dorusti.
U bresha
chshingernas
kashta opra mandi
ti tatsera
manushwn da,
kontu dehavas!

HRAMUSARDI KOTORA
ANDW BREKISTI

TRASH I TRINI KURKINDAR
TI U KUVETSI TI OVIS MASTURUS

Arugantnu mw shiyzipnasti ti ova masturus, sotu shiyzava – kerava, sim sar machshu andw pwisti. Phoswim andw phuveti siyada trendafiluya – sar u Ekzyuperi. Kidibor vidwya – u zhivotus ti na nakhil chuchws (tho i phuveti barem ekh)…
Zhi kwtka – lachshws. Ta u trin kurki ya abdwypi ekhi barvali manushwsti, lyas sidhanta ti chshinil i perikanta andw ekhi bahchasti. Na ma ipera anova ti na ma ti ahwykera so si kwka perikanta (kwka si burr buti karrwntsa). U karra te si te amarw bwirya shiyzinas ti kaskanin laki.
Hemen arogantna, kimbili nanwy mardi (amarw gavisti ekhi mardi manushwski dena duy nanwy mardi).
Trash achshwla i Doniski. Trash na syas man. Sourru syas mangi “zhus”.
– Isi man chemshiri ti phova lis – arjanu mursh kerlas mangi oferta (sade ti na swrzim liskw yakha).
Palal u agor i phoswmnasti i kwli kapriznu burr piim pivus, dini mangi astali. Lachshws syas mangi. Nanwy astalindar.
U oi bendzyas pis i averi zeswsti. Mwrrw kolegingi – kukuzi, mangi – santsan khek mangilas ti dikhil kibor si mu masturlutsi.
– U chimshiri nanwy lis – u baru kerlas pheryas santsan nikachshi na syas olu.
– Kikidina tut tw postwya katimwya?- vakerimtar kide, ta ti shunil man. Mangseylas ti kanda lis. Liskw “pavazya” syas turya listi, syanas aver homer – sotu mangilas oda, kwlis mw kernas, mursha na syas.
– Kati si? – harnis kerlas pheryas, sar baru.
– Na punjarsa man – morru da johapi syas harnu. Palal kwlis dalzyam andu hoynisku maribi ti oda lyas ti dishwyl mangi kibor baru gomi isi lis. “I sofra mw phagil pis”. Sade me ti oda na syamas otka.
– Mw azhutinis mangi! – lisku saldatsisku pheryas shundzyas pis sar nivedan.
– Ti sanwyrsa, ta me kerim lis, na ma avil pash tuti! – andw mw sesisti asha na sa syas.
Thima vakwtsi potwyzimnasti ti u agor:
– Tasya mangava lis pali otka. Uzharava manusha khwrw ti has-ti pyas! Kibor astali mw mangseyn, na interesuyzila man.
Zhanavas. Mangisa ti bubaris birdem.
Ekh anglisarnu manush achshilu bi chemshirisa angla porru darwsti. U manusha ali, u Baru syas o`key. Me ti duy amala piyamtar ekh kilos “Slivensku” tapasa. Mu nak thavdilas duy zesa. Palal nakistu mangi. U baru chshim lis mandarpalal vakwtsi. Achshilu u chemshiri ti morru mangipi ti ova masturus.

U RATSIMNASKU THAGAR
SI MU AMAL YA
U KUVETSI TI GOMIZIS
I TRASH

Bibahtwypi ya baht? Na zhanava. Ya pali kerava man diynu. Yalwnkatsi butsi. Mu pheryas astsyal i zhukliski ti u kokala tela i liskw kherwsti – ya lisku kher ti u kokalangu zhukel?
Sar syas? Thavdilas len informatsiyatar, pali me na shi swravas sotu ti ovil. A, kide, kide, trashwski astsyal (nanwy i Doniski).
Tradavas ratsi kashtingi. But-but na mangseynas pis mangi. Mangavas ti ova shantikanu ti ti loyza morru dehibi karig mandi. Ti ova manush averwsku. Ti ekh, sartu vakerna u frankikani manusha, kurtoaziya. Andi soba – yag. (Me ti thara). Dukhavah i vidwingi te chshinavas lin. Eyiangu pali avilas ti me shunavas but lachshws u trenus te avilas. I trash vadilas pis andw mandi. Mangavas ti dya lis dumu pali ti pali ti … ovilas. Kibor droma. Bresha ti bresha. Sade u korkorrw zhukela zabanas pwrri ziy ti trashanas ti na khidin pis ekhisti. Chshipas, kontu na syas amingi. Asavas hemen-hemen trashadis ti hemen tavryazi rivizimtar:
– Rima mursha achshilitar andu kwka thagaripi! Rima! Ti rima pela pis!
U Goshus asalas dzindzerlws ti vakerlas:
– Ama ti zhanis kibor chachuypi isi andw tw pheryaswndi!
Isyas?

RAT
LASTIPNASA
THARDU SHEKERI

Nanwy stilistichnu bezah. Vakerava “nashaldu” rat, nanwy “halumi” maribi. Kimbili isi averipi. Me da, sartu mwrrw anglisarni dada dim tekmes sourrw maribingi, ama nashwim sourrw rata. Morru rat na syas “Mwrfiski rat”. I rat mwrri na syas mamuy khekisti. Sourrw tira, katapultin, yag ti tufwy syas sa mamuy mandi.
U Mwrfi si bahtalu. Thoyas pw zhebeti ekh shiyzimnasku maribi. Pali me mangavas ti lya ekh nashaldu rat. Rat, kontu me thoim mw shwrwsti ti kontu ozizimtar mamuy mandi. Maribi ti na ova averwsku. Nanwy dukh, nanwy ironiya. Mwrrw 16 bresha asharnas pis ekhi binyayasa. Odiya – i binyaya bendzyas u agu ti agornu rat, kontu nashalzim. Akana, kana nakisti u bresha, asava. Kerkikanis, lastipnasa thardu shekeri.
Kwka rat thodi la andw tumarw shwrwndi tumin. Thodi la andw tumari shwrwndi sa phendzimnasa ti na nashwin la. Kanatu tumin tssiin latar, me chatnava mw yaradis. Yaradis te si mw dumisti. Aparichitaku! Hata phirravasli mamuy tumindi!

 

I RENA

– Ou, Rena, pala i vidwindi soisa, ipalzi sar zhukel?
Devla, swy pheras kerava? I Rena. Chachus si zhukel.
I mwrri Rena. Morru nashalzipi. I hazi. I but hazi. I mwrri bihazi. I kwi mwrri. Te patsava laki. Te terisa zhi i darwsti. Zhi i ilisti, kontu thovavas lis otka. Ti uzharnas man u duy da. I don da, te patsyavas lingi. Na syas ne ekh nashaldu manush.
Morru nashalzipi. I kwi mwrri. Te patsava laki. I hazi – i Rena, – zhukel morru.

 

EKH GARA,
EKH KOMANDIROVKA
YA HEMEN SHVEDSKU TRIN

Zis sar zis. Longu ti tangu. Thodili mangi u Rachus andw lenati. Gabrovska bustya. “Lyubovo” mahala. Bishundu, shantikanu. Kwlis mangavas. Ti ekh len. I Pashaki len (lotsi ti oil laki chik).
Uzharavas ti benil pis. Mi duiski chshwy. Chshimli palal mw dumisti duy pheya, te syas bendi ekhisti (kana astaravas ekh biarjanu flirti).
I Nina ti panda ekh persona, kontu mangavas nanwy sade sar zhuvel.
Tssiynu ti zhungalu i murshikanistar te si andw mandi, dim mangi pheryas ti ova veki aver manush.
Soba panjw thanintsa, ratsimnangu shkafchitus talvarisa mwrri chshwyasa. Ti swrzerwl mangi i Dachuski – laki dwy.
U lachshw mangipya ti kera chshipas ti me.
– Dwy zhanna tumin kati si i “Optika”?
“Ti na astarws pali”!, dim man gozi.
– Zhanava! – dim johapi ti u lachshw mangipya prastani birdem.
Trashazi, bizorwy andw pisti, i Roza oi aver kana thoilas lazhwymnasa u neviskerdi pwrrw phagli yakhali.
Simas komandirovkati, mursh simas. Simas ekh hanjalu zhukel.
I Nina vadilas u tilifoy her zes. Mi rrumi odiya da. I zhuvel, kontu mangavas, wi pash mandi. Zheratsi i Rozasa mw zhasas te Dryanovsku manastiri. Isyasas man loyzi soba andu hotelus. Mu shoru syas aladu. Ipwim u phendzipya ti bisterim i Rozaki. Pali trashazi, pali bizorwy. Dukhalas man. Laki.
I Zina wi soskutu kisalu syas laku adetsi. Isyas man panda sastu kurku i mulwy komandirovkatar. Na syas man nervis. Pyavas but, sastsi rat pyavas but. Ekh duhturka, konatar lazhavas ti dikhil man nangu.
– Me sim dohturus, va, halumiya!
Kisalu simas. Halumi.
Agornu zes. Imteha. Ti u en kathornu mangi.

“So olu amintsa”?
I Roza

Ekh hramusaripi santsan anglisarni breshwndar kana syamas sikavni. Ti, chachus, so olutar? Dwy dimas khek pheryas. Dukhwykerim tut? Maf ker mangi!
Mi palapurta, me ti u tssiypi.
– Il isi tut! – vazim dikhipi.
“Of, Devla, ma”! – nakhistu mw gozeti.
– Andu mu kabinetus si! – syas piski chendzipi.
– Nelo, loyzi lis pash tuti.
– Isi tut vakwtsi?
Aami, isyas man vakwtsi. Sastu vakwtsi i 22-breshwsku mursh-zhukel.
Te gara i Roza ti i Nina na shi olwynas pis. Mulani zhuvlikani asuya ti u kavaleri te si andw mandi. Dim lin angwy. Her lindar roilas dyali angwy ekh i mwrrw pikindar. “Mulanu ti achshws” – dyavas man gozi astsyal mangi. Metruya i avtobusistar i Sofieti, ekh “Fordus”, ekh shukar zhuvel uzharlas man shantikanis.

 

ASHCHARIKWY YOGYA
I FINIKIYNTSINGI
TI ASWYKERWN MAN

Vakerna, ta odwna alakhlili u astali. Zhi kwka lachshws. U chachuymnasku puchibi sar ti dalzikerws lin tw zhebeti? Ti loshazisa lingi ti palal ti harchizis lin. Gozyasa ya nanwy – kwka si twrri butsi. Lintsa shiyzimnis ti tsinis tuki hemen-hemen sourru. Amalin da. Zhuvel da mw tzinis tuki. Ama kon kas tsinna – u astali – tut ya tu – u astali? Sar tsinna pis astali? Kwka paradoksi si? But lokis si – tut desa astsyal astalingi. Ti khek tsinna tut – astalintsa, ahwyla pis. Tsinsa tw astali.
U Iskrenis (nanwy Petsov), chshov i morru kolegus, dyas mangi astali anglal ti kera i butsi. Vazim lingi veshtisku kher palal “Lechkov”. Andw zeswsti kana irizim liski u astali, na mangilas ti lel lin.
– Mw tsinis man? – puchim lis hoynis.
Dikhyas man ti bishundis, sar pisti, vakeryas:
– Ti mangavas da, na shi. Tu ne tsinsa tut, ne bikinsa tut..
Aswimtar tssiynis, palal lim ti asa. Koniski? Finikiytsingi, ahwyla pis.

 

PISTI
TI ISI TUT
TI DES

Bu chovru na simas nikana. Mw yakha pwrna opra kekh chiftsi zhuvikani postwya. Kaskw syasas?
Trazimtar ti bikina lin. Ti akutu u idealnu tsinzimnasku manush:
– Desh leya kwkwli postwyngi! – vakerava, ama kidibor lazhava, ta na vadava yakha.
– Lachshws! Tsinava lin! Akwtw u panch leya. Isi tut ti des man panch. Sourru si sar mangseyla pis.
Vadava mw yakha. “Soski si kwka absurdi”! Bikinava u chiftsi postwya piski ti isyas man ti dya mangi panch leya.
– Ovila – loshadu dyava johapi pisti mamuy pisti.
– Nanwy, na ovila! – kwka si u lisku johapi. – Akana man mw ovil man chiftsi postwya, pali tu – panch levuya.
– Ti nikon na ma ti ovil ti del i averwski?
– Nanwy, me akana mw ovil man ti dya tut panch levuya ti chiftsi postwya! – dela man oda u postwya ti lela u panch leya.
“Pherdu absurdi!”, dyava man gozi. Ti ovil man ti dya mangi?
– Tw dadisku kokalus, Tsetso! – hemen-hemen rivizava.
Zhangwim man. I kyosheskw thanisti chachus terinas chiftsi zhuvikani postwya.
Te rastsimnasku shkafchitus u panch levuya te isyas man ti dya mangi. Andu kherwsku hamami ekh zhuvel nwerlas pis.

 

SHUKU GAD
EKHI TSIGARAKI

I Silvieki,
i Radostaki
ti i Zdravkuski

Achshiimtar gechi, soskutu bisterim. Bisterim, soskutu achshiim gechi. Ti dwy syas achanakis ya nanwy, na simas dukhanu. Nanwy kidibor dukhanu, ami matu. Ti nanwy u agorni duy, ami u tretuni – tsiynu. Ti kwka nanwy u agornu sosipi. Isyas man panda shwl ti ekh hoh. Bindi ekhi tolerantnusti ti chshipas averwsku. Bindi ekhi tatsipnasti ya puchakarnaski.
Dyas brishind. “Brishind nilwysku, tatu brishind”.
Ahmimi amarw balvalisa, irizyas pis andw nilanu tufwy. U pivuski fiesta syas andw porru agorni zeswsti. Sourrw i sofradis opra kashtingw patuya. U “BTR si piski BTR ekhi ashavadisa – u balval ti u brishind. Diernas amin u aparatuya, uranas pasiya. U kontsertus na shi ovilas.
Simas dukhanu, tssiynu ti matu. Chshim mu gad ti na pwerwl pis ti zabavas “Tatu brishind”… Pyavas mu agornu pivus ti dyavas man zorwypi ti na roykera man.
U brishind gelu piski. Sourrw syas susla ti zhanas piski. Mangseylas pis me da ti trada.
U chshavi vakerdi mangi “I Devlisa”.
– Pali mw dikhas amin!
– Patsyava!
Mangseylas pis ti shunseil optimistikanis.
– Dyava shuku gad ekhi tsigaraki!
Kwka simas me. U chachukanu.
Teri chshwy aswymnasa dyas mangi.
– Akutu! – aswi hemen dukhanis.
– Bi tusa u themi mw ovilas dukhaku!
Potwyzavas. Pheryasa na syas man.
– Trashava, ta zhi kanatu ova deshuohtobreshwngi, tu mw purwis – sep trazyas odiya. – Chumidi man. Di man kuka, ma di man gad!
I dukh indriykerim sar chshuri. I tsigara tharlas mw angushchya.
P. H.
Kiya istoriya si tumari!
Parikerava tumingi, ta syanws andw mandi.
Dehimnasa!

Tsetsus

U RAMBUS ”O”

Do pheryaswntsa – u Rambus shunya. U talantus ti potwyskeris i dukh.
Mw erkenjikakw swrzipya kwliski si an kisali.
5-6 purani “Chepel”-uya iganas phuv astsyal i keramikwy havraki andw gavisti, katutu sim bendu.
Kana nakhinas turyal amindi rivizasas karig lindi ti u ondorjedis, kana manginas zaprizinas ti lenas khek amindar. U shov kilometruya zhi i “Petolwchkati” syasas u mwrrw agw “stopajiyska”.
Ekh drom u ordon arwyas pis, ekh kolegus lisku zaprizyas. Zoralu buksiri, chalwyam amin ti u khwypi alu. U tsikurru angushtu morru ondorjisti oshtwyas pis. Inkerlas pis ekhi shutsi zhilati. Keryas oda hoymi fizionomiya, chshyas karig mandi dikhipi ti vakeryas:
– Kimbili so oluli, koshibi…
Ami, aslw kide syas, hemen koshibi…
Inkeravas kwka longu potwyzpi i dukhaki ti kaskanwyrumas. Kaskanwyrumas ta na olu mantsa. Ti hich na nakhilas mw gozeti, ta mw ova u en lachshu lisku sikimnu.
Akana palal kidibor bresha me dim kwka indriypi i mwrrw antadi chshaviski.
Zorwyskeravas u boltus i peperiskw mashinkati, i chshuri gei ekhi rigati ti dalzi andw mw changisti opral mw kochwsti. Thavzii rat. Ekhi sekundaki mi pantolona pherzyas pis ratisa. U kwzwy trashwyas pis. Mwrri reaktsiya syas aswypnasa:
– Kimbili so oluli, koshibi…
Oda asanu. Kerim kide, sotu mangavas. Palal, kana phandi man bintuintsa, kerim i kwzwyski pheryas astsyal avtoristi kiya istorieti.
– Dade, kana ova baru ti ovil chshipas sar kwka, na ma ti rova. Tu mw ovis mw gozeti.
Dim lis angwy. Ti na dikhil mw aswya. Nanwy asuya dukhatar, asuya kuvetsistar. U kuvetsi, ta potwyskerim i dukh. U trini manusha ekhisti – u ondorjis i mwrrw kwzwngw breshwndar, me ti morru antadi chshavis.
– Kimbili so oluli, koshibi…

 

19 SAHATSINGU
ANOVISA FARENHAYT

U trotoari – kotora shil. Dyuzi sar zhemi. Dyuzi sar avzin. Ha oshtikersa bangis…
Odiya naoprw, me nateli ti … olutar. I reaktsiya mwrri syas sar sivibi. Ekh vas alu says andw mwrrw vastisti. Olitar duy.
U dikhipi trazyastar i uchw mortsikani botushindar. Bluzonus uchsharlas lakw changa. Pali odwna na syas lin agor. I bala lakw uranas sar u bala i zhuvikani aslwysti. U yakha lakw…
Mangseylas pis ti astara lintsa. Ekh aparichitaku ahmipi nilwystar ti charikanistar varnis.
Tsami, koniski syas lachshws ti zhivindzis.
– 19 sahatsingu anglal i Opera – shundzim laku sesi.
– 19 sahatsingu anovisa Farenhayt ya anovisa Tselziy? – puchimtar.
– Sa ekh! – vakernas lakw yakha.
U longu Slavis nakhilas ti dikhilas amin uchwstar. La dikhilas. “Bengey butsi” – dim man gozi. Angla koni operati? Thagaripnaski ya Butserni?
Nakhistsi turya mandi ti na shi dyam amin mamuy.
Zhangwim man. Avri u slivensku balval hurzerlas u shil. Syas telal u shunyati. Andu Sliven si kati-kati bu lokis. Isi sade ekh opera. Ama veki syas mangi sa ekh. Ti i Farenhaytiski, ti i Tselziyski. Ama na shi terya ekhi thanisti, soskutu sa puchava man dwy isi andi Sofiya duy operis ti drom “Rakovska”?

Advertisements

Вашият коментар

Попълнете полетата по-долу или кликнете върху икона, за да влезете:

WordPress.com лого

You are commenting using your WordPress.com account. Log Out / Промяна )

Twitter picture

You are commenting using your Twitter account. Log Out / Промяна )

Facebook photo

You are commenting using your Facebook account. Log Out / Промяна )

Google+ photo

You are commenting using your Google+ account. Log Out / Промяна )

Connecting to %s